آنتالیا یئنه رکورد قیردی
آنتالیایا ان چوخ توریست گؤندرهن اؤلکهلر سیرالاماسیندا آلمانیا، ایلک سیراداکی یئرینی بو ایل ده قورودو
![آنتالیا یئنه رکورد قیردی](http://cdn.trt.net.tr/images/xlarge/rectangle/894e/f70f/4c35/660d006c9bedb.jpg?time=1722044922)
آنتالیا، ایلین ایلک ۵ آییندا آغیرلادیغی ۴ میلیونا یاخین یئرلی و خاریجی قوناقلا رکورد قیردی.
کۆلتور و توریزم باخانلیغیندان وئریلن آچیقلامایا گؤره، آنتالیانین ایلین ایلک ۵ آییندا آغیرلادیغی قوناق ساییسی، گئچهن ایلین عینی دؤنمینه گؤره یوزده ۱۶،۲۶ آرتدی.
توریزمده بوتون زامانلارین ان یاخشی باشلانغیجی رکوردونو تزهلیهن آنتالیا، سؤزو گئدن دؤنمده ۳ میلیون ۹۵۹ مین ۲۶۷ قوناق ساییسینا چاتدی.
آنتالیایا ان چوخ توریست گؤندرهن اؤلکهلر سیرالاماسیندا آلمانیا، ایلک سیراداکی یئرینی بو ایل ده قورودو.
آنتالیایا ان چوخ قوناق ۹۷۴ مین ۲۷۲ ایله آلمانیادان گلیرکهن روسیا ۸۵۷ مین ۸۶۲ قوناق ایله ایکینجی، اینگیلتره ۴۵۱ مین ۳۴۱ قوناق ایله اوچونجو سیرادا یئر آلدی.
بو اؤلکهلری سیراسییلا لهستان، هلند، قازاقیستان، اوکراینا، لیتوانی، بلژیک و فرانسا ایزلهدی.
گئچهن ایلین عینی دؤنمینه گؤره، آنا بازار اؤلکهلردن گلن قوناق ساییسیندا آلمانیا یوزده ۱۸، روسیا یوزده ۹، اینگیلتره یوزده ۲۸، لهستان یوزده ۳۵، هلند یوزده ۱۶، قازاقیستان یوزده ۱۲، اوکراینا یوزده ۵۹، بلژیک یوزده ۱۲ و فرانسا دا یوزده ۳۹ آرتیش قید ائتدی.
دنیزی، قومو، گونشی، تاریخی و طبیعی گؤزللیکلری، مدنی یاپیلاری و آنتیک شهرلری ایله یئرلی و خاریجی قوناقلارین ماراق مرکزی اولان آنتالیا، می آییندا دا قوناق ساییسیندا رکورد قیردی.
می آییندا آنتالیایا گلن قوناق ساییسی، بیر اؤنجهکی ایلین عینی آیینا گؤره یوزده ۱۸،۷۲ آرتاراق ۱ میلیون ۸۹۲ مین ۳۰۲ اولدو.
میده شهره ان چوخ توریست گؤندرهن اؤلکهلر سیرالاماسیندا روسیا ایلک سیرادا یئر آلدی. آلمانیانین اؤنونه گئچهن روسیادان آنتالیایا ۴۹۱ مین ۷۸ قوناق گلدی.
آلمانیا ۴۳۴ مین ۶۰۹ قوناق ایله ایکینجی سیرادا یئر آلارکهن، اینگیلتره ایسه ۱۸۵ مین ۲۲۱ قوناق ایله اوچونجو اولدو.
لهستان، هلند، قازاقیستان، اوکراینا، لیتوانی، رومانی و بلاروس ایسه اینگیلترهنین آردیندان سیراسییلا گئچهن آی آنتالیایا ان چوخ قوناق گؤندرهن اؤلکهلر آراسیندا یئر آلدی.
گئچهن ایلین عینی دؤنمینه گؤره، می آییندا آنا بازار اؤلکهلردن روسیا یوزده ۲۶، آلمانیا یوزده ۱۴، اینگیلتره یوزده ۲۳، لهستان و هلند یوزده ۳۸، قازاقیستان یوزده ۱۱، اوکراینا یوزده ۶۶، رومانی یوزده ۴۵ و بلاروس دا یوزده ۳۶ آرتیش قید ائتدی.