تورکجه سیناوینا باش‌وورولار آرتدی
یونوس امره انستیتوسونون خاریجیلره یؤنه‌لیک تورکجه یئته‌نک سیناوی ۱۳ ژانویه جمعه ارته‌سی گونو گئچیریله‌جک
یونوس امره انستیتوسونون ۳۵ اؤلکه‌ده ۴۱ نقطه‌ده ائش زامان‌لی دوزنله‌یه‌جگی تورکجه یئترلیلیک سیناوینا باش‌وورو نیسبتی اؤتن ایلله مقایسه‌ده یوزده ۶۰ آرتدی.
یونوس امره انستیتوسونون خاریجیلره یؤنه‌لیک تورکجه یئته‌نک سیناوی ۱۳ ژانویه جمعه ارته‌سی گونو گئچیریله‌جک.
تورکجه‌نین اولوسلارآراسی میقیاس‌دا ایستاندارد بیر سیناوا قووشماسی و خاریجدن اؤیرنجی قبولونو آسانلاشدیران سیاستلره دستک اولونماسی مقصدیله حیاتا گئچیریلن تورکجه یئته‌نک سیناوی، ۳۵ اؤلکه‌ده توپلام ۴۱ نقطه‌ده ائش زامان‌لی گئچیریله‌جک.
ایکی اوتورومدا ائدیله‌جک سیناوین بیرینجی اوتوروموندا اوخوما، دینله‌مه و یازما، ایکینجی اوتورومدا ایسه دانیشما باجاریقلاری اؤلچوله‌جک.
تورکجه دیل یئترلیگینی رسمیلشدیرمک ایسته‌یه‌ن نامیزدلرین ایشتیراک ائتدیگی سیناودا اوغور قازانان نامیزدلره، پوئنلرینه گؤره ب۲، ج۱، ج۲ سویه‌لرین‌ده تورکجه یئترلیلیک سندی وئریلیر.
تورکجه یئته‌نک سیناوی نتیجه‌سین‌ده تورکجه یئترلیک بلگه‌سینه صاحب اولانلار، تورکیه‌ده هر هانسی بیر اونیورسیته‌ده تحصیل آلماق حاقی قازاناندا تورکجه حاضرلیق صینفی اوخوماق‌دان معاف توتولور. تورکجه یئترلیک سندی، اؤیرنجی‌لر قدر تورکیه‌ده، یا دا اؤز اؤلکه‌لرین‌ده اولوسلارآراسی فعالیت گؤستره‌ن شیرکتلرده ایشله‌مک ایسته‌یه‌ن شخصلره، تورکجه ترجومه‌چی‌لیک ائتمک ایسته‌یه‌نلره، یا دا خاریج‌ده تورکجه اؤیرتمک ایسته‌یه‌ن اؤیرتمن نامیزدلرینه ده ایش مراجعتلرین‌ده بؤیوک اوستونلوک ساغلاییر.
سیناو، ۲۰۱۳.جو ایلد‌ن بری ایلده اوچ دفعه گئچیریلیر. هر گئچن ایل ماراغین داها دا آرتدیغی سیناغا بو گونه قدر ۵ مین ۶۲۰ نامیزد مراجعت ائتدی. بو شخصلر آراسین‌دان ۳ مین ۶۶۱ نامیزد اوغورلو اولوب تورکجه یئترلیک سندی آلماغا حاق قازاندی.
۱۹ مارس ۲۰۱۸ده یئنی مراجعتلرین قبول اولوناجاغی سیناوین ایکینجی اویقولاماسی ۵ می‌ده اولاجاق. ایلده اوچ دفعه گئچیریلن سیناوین بو ایل ژانویه، می و سپتامبر آیلارین‌دا گئچیریلمه‌سی پلانلاشدیریلیر. تخمیناً ۱ آی اول باش‌وورولارین آلیندیغی سیناولارین نتیجه‌لری ۲۰ گون مدتینده آچیقلانیر.
آیرینتیلی بیلگیلری "tys.yee.org.tr" آدرسیندن الده ائدیله‌بیلرسینیز.