آذربایجان تمثیلچی‌سی "یوروویژن "ون فینالیندا!

اوکراینانین پایتاختی کیف-ده، اولوسلار آراسی سرگی مرکزینده "یوروویژن-2017" ماهنی موسابیقه‌سی‌نین بیرینجی یاریم فینا‌لی کئچیریلدی.  

بیرینجی یاریم فینالدا 18 اؤلکه فینالا کئچمک اوغروندا یاریشدی. آذربایجانلا یاناشی، سوئد، گورجوستان، اطریش، آلبانی، بلژیک، یونانیستان، لهستان و باشقا اؤلکه‌لری تمثیل ائدن ایشتیراکچی‌لار چیخیش ائتدیلر.

آذربایجانی تمثیل ائدن دیانا حاجی یئوا صحنه‌یه سککیزینجی چیخا‌راق " Skeletons" ماهنی‌سینی ایفا ائتدی.

 " Dihaj" تخلصی ایله چیخیش ائدن دیانا حاجی یئوا-نین ماهنی‌سی‌نین مؤلف‌لری بسته کار (آهنگساز) عیسی ملیکوف و ساندرا بیورمان‌دیر.

شوونون کوروقرافی (طراح رقص) امکدار آرتیست نایله ممدزاده‌دیر. عمومی لیکده 6 نفرین یئر آلدیغی صحنه‌ده صینیف اوتاغی قورولوب و یازی تاختاسیندا شعارلار قئید ائدیلیب. " Dihaj "ین ساغیندا پیللکه‌نین اوزرینده باشیندا آت تصویری اولان رقاص  یئر آلیب. بئله تصور اولونوب کی، اوغلان اؤزونو یوکسک‌دن آپاریر و دیانانین فیکیرلرینه اؤنم وئرمیر.

رقص زامانی دیانا "اوغلان"ا اعتراضینی بیلدیریر. نتیجه‌ده او، آشاغی دوشمه‌یه مجبور اولور. سوندا صینیف اوتاغی داغیلیر. Dihaj اعتراض ائدیر. او، ایستگینه نایل اولور، اما آرتیق گئج اولدوغونو آنلا‌دیر. صحنه  سونوندا اوست گئییمینی یئره آتیر و شوو باشا چاتیر.

چیخیش‌لاردان سونرا 15 دقیقه عرضینده سس وئرمه کئچیریلدی. آذربایجانی "Skeletons " ماهنی‌سی ایله تمثیل ائدن دیانا حاجی یئوا ماهنی موسابیقه‌سی‌نین فینالینا یوکسلدی.  

دیانا حاجی یئوا-دان باشقا، مولدوی، یونانیستان، سوئد، پرتغال ،لهستان، اطریش، قیبریس، بلژیک و ائرمنیستان دا فینالا چیخدی.  

قئید ائدک کی، ایکینجی یاریم فینال می ین 11-ده، موسابیقه‌نین فینال مرحله‌سی می ین 13-ده کئچیریله‌جک.