نوبل ادبیات اؤدولونو آلان باب دیلن: من تورکم!
باب دیلن، ننه‌سی‌نین تورک کؤکن‌لی و ترابزون‌لو اولدوغونو، قیرغیز سوی‌آدی داشیدیغینی یازیر
2016 نوبل ادبیات اؤدولونون صاحبی اولان آمریکا‌لی پروتست مغنی باب دیلن، یاشامینی آنلادان کیتابیندا، آتا‌لاری‌نین تورک اولدوغونو ایفاده ائتدی.
باب دیلن، حیاتین‌داکی اؤنم‌لی دؤنملری ایضاح ائدن 304 صحیفه‌لیک کرونیک‌لر کیتابی‌نین ایلک جیلدینده، ننه‌سی‌نین تورک کؤکن‌لی و ترابزون‌لو اولدوغونو، قیرغیز سوی‌آدی داشیدیغینی یازیر.
ارگن‌لیک ایللرینده ریچی ولنسین "این آ تورکیش تاون" ماهنی‌سینی دیلین‌دن دوشورمه‌دیگینی یازان باب دیلن، "آنامین نئلی تورک آدیندا بیر یولداشی وار ایدی. بیزیم ائودن چیخمازدی. من ده او ایللرده هر کسین 'لا بامبا' آدلی ماهنی‌سینی بیلدیگی ریچی ولنس گیزملی تورک‌لری و گؤی اوزونده‌کی اوزاق اولدوزلاری آنلادان 'این آ تورکیش تاون' آدلی ماهنی‌سینی سؤیلیردیم" دئییر.
کیتابدا؛ "ننه‌مین چتین بیر حیات ماجراسی وار. گونئی روسیادا بیر لیمان شهری اولان اودسا‌دان آمریکایا گلمیش‌لر. اورا دا بیر باشقا قارادنیز لیمان شهری اولان تورکیه‌دن، ترابزون‌دان کؤچ ائتمیش‌لر. ننه‌مین عایله‌سی اصلا کیچیک بیر قصبه اولان کاغیزمان‌لی‌لاردان (قارس). سوی‌آدلاری قیرغیزمیش. ننه‌مین آتا‌لاری، ایستانبول‌دان بو بؤلگه‌یه گلمیش‌لر. بؤیوک‌بابامین عایله‌سی ده عینی بؤلگه‌دن گلیر. دری ایشیله اوغراشیرلارمیش" ایفاده‌لری یئر آلیر.
باب دیلن، نوبل اؤدول کمیته‌سی طرفین‌دن، دونن، آمریکا ماهنی مدنیتینه یئنی بیر شعرسل آنلاتیم قاتدیغی اوچون نوبل ادبیات اؤدولونه لاییق گؤرولموشدو.
