تورک مطبخی (09)
اتلی قورو لوبیا بیشیرمک
تورک مطبخی - 09
----
لوبیا چوخ قدیم دؤورلردن بو یانا دونیانین بیر چوخ یئرینده یئمگی بیشیریلن بیر باغلیات. . جنوبی آمریکادان اوزاق شرقه؛ آفریقادان آوروپایا قدر گئنیش بیر جوغرافیادا بیشیریلیر و اساساً ده دوگویله بیرلیکده مصرف ائدیلیر. بو وضعیت تورک مطبخینده ده فرقلی دئییل. خصوصیله اتله بیرلیکده بیشیریلن و سولو یئمک اولان "قورو لوبیا یئمگی" تورکیهده دئمک اولار کی، هر کسین سئوهرک یئدیگی یئمک. حتی بعضیلری اونون اوچون "میللی خؤرییمیز" بئله دئییر. تورک مطبخینین پروقرامیندا بیز ده بو گون اساساً یانیندا دوگو پلووو و تورشو ایله خیدمت ائدیلن بو لذتلی یئمگین تعریفینی وئرجگیک.
---
اتلی قورو لوبیا بیشیرمک اوچون اوّل ماتریاللاریمیزی سایاق؛
2 سو ایستکانی قورو لوبیا
1 عدد خیردا دوغرانمیش سوغان
2 یئمک قاشیغی بومادور روب
2 یئمک قاشیغی کره یاغی
250 قرام قوشباشی دوغرانمیش پارچا ائت
2 عدد یاشیل شیرین بیبر
1 شیرین قاشیغی دوز
1/2 چای قاشیغی قیرمیزی بیبر
6-7 سو ایستکانی سو
-----
زامان گلدی "قورو لوبیا یئمگینی" بیشیرمهیه؛
ایلک اولاراق قورو لوبیالاری ان آز 8 ساعات سودا ساخلایاراق شیشمهلرینی تامین ائدین. بیتکیلر کیفایت قدر قاباراندا یویون، سوزون و بول سویلا دیریجه پؤرتون/ هاشلاین. قایناما زامانی اوستونده توپلانان کؤپوکلری بیر کفگیر کؤمییله آلین و سویونو یئنیدن سوزون.
بو زامان باشقا بیر قازاندا یاغی چاتدین، ایچینه قورو سوغانلاری و یاشیل بیبرلری علاوه ائدهرک قووورون. اتلری علاوه ائدهرک قووورمایا داوام ائدین. سونرا روبو علاوه ائدین و قاریشدیراراق داها بیر نئچه دقیقه قووورون. اتین اوزرینه چیخاجاق قدر قاینار سو علاوه ائدین. یئمگین سویو قایناماغا باشلایاندا دیریجه پؤرتموش/ هاشلانمیش قورو لوبیالاری ایچینه تؤکون. دوز و قیرمیزی بیبر علاوه ائدیب بیشمهیه قویون. لوبیالار یاخشیجا یوموشایانا قدر بیشیرین. یئمگینیز آرتیق حاضیردیر! تام تورک اوصولو اولسون دئسهنیز یانیندا دوگو پلووو و تورشویلا سرویس ائدهبیلیرسیز. عافیت اولسون!
----
تورک مطبخی پروقرامیندا بو گون تورک مطبخینین کلاسیکلریندن اولان "قورو لوبیا" یئمگینین تعریفی پایلاشدیق سیزلرله. باشقا بیر وئریلیشده بیر باشقا تورک لذتی ایله گؤروشمک اوچون ساغ اولون.