گوندم آنالیز: 32
قازانارکن آلمان، ایتیررکن موهاجیر اولدوم.
آوروپادا عیرقچی‌لیک و ایسلاموفوبی آرتماقدا داوام ائدیر. آوروپا بیرلیگی نین اساس عضو‌لریندن آلمانیادا ناسیونال سوسیالیست کئچمیشیندکی ترندلره اوخشار شکیلده پروسه‌سین یاشاندیغی موشاهیده اولونور. عرقچیلیگین و ایسلاموفوبینین نورماللاشماغا باشلادیغی آلمانیادا مسعود اؤزیل ایله علاقه‌لی باش وئرن قالمالاق و آلمان میللی تیمی‌نین اولدوزو ساییلان اؤزیلین ییغما تیمده کاریئرینی باشا وورماسی عیرقچیلیگین و ایسلاموفوبینین هانسی سویه‌ده ایرلیلدیگینی اورتایا قویان اهمیت‌لی گؤستریجی‌دیر.
مسعود اؤزیلین پرزیدنت رجب طیب اردوغانین اینگلتره‌یه سفری زامانی اونونلا شکیل چکدیرمه‌سی آلمان مئدیاسی و بو اؤلکه‌دکی سیاسی خادیم‌لر طرفیندن آلمان توپلوموندا دونیا کوپاسی عرفه سینده جدی بحرانا گتیریب چیخاردی. اؤزیل اصلینده 2010-جو ایلدن بری‌دیر هر فورصتده گؤروش کئچیردیگی و شکیل چکدیردیگی دؤولت باشچی‌سی رجب طیب اردوغان اوزریندن هدف گؤتورولدو و عیرقچی تحقیرلره معروض قالدی. آلمان میللی فوتبال تیمی نین اولدوز مسعود اؤزیلین حقارت‌لر و تهدید‌لره معروض قالماسی قارشی‌سیندا سسسینی چیخارمادی. اؤزیل فدراسیونونون صدری راینهارت قریندلین طلبی‌نین عکسینه پرزیدنت اردوغان ایله فوتوسونا گؤره عذر ایستمه‌دی.
آلمان میللی‌سی‌نین دونیا کوپاسینا وداع ائتمه‌سی قارشی‌سیندا آلمان مئدیاسی‌نین بونو مسعود اؤزیلین فوتوسو ایله یایماسی و آلمان فوتبول فدراسیونونون صدری راینهارت قریندئلین آلمان میللی‌سی‌نین دونیا کوپاسیندا مغلوب اولماسیندان مسعود اؤزیلی مسئول توتماسی سون داملا اولدو. نتیجه‌ده مسعود اؤزیل پرزیدنت اردوغان ایله چکدیردیگی فوتودان اول عمره زیارتیندن پایلاشدیغی شکیل‌لر ایسلاموفوبیک یاناشما‌لارا و حقارت‌لره معروض قالمیشدی.
اؤزیل ایسه سسینی اوجالدا‌راق اوچ حیسه‌دن عبارت مانیفست یایدی. اصلینده مسعود اؤزیلین بؤیوک بیر جسارتله تویتر واسطه‌سیله اینگیلیسجه یایدیغی مانیفست آلمانیادا عیرقچی‌لیک و ایسلاموفوبیا یاناشمانین چاتدیغی نقطه‌نی آچیق شکیلده اورتایا قویدو: قازانارکن آلمان، ایتیررکن موجاهیر اولدوم.
مسعود اؤزیل اصلینده یایدیغی مانیفست ایله فوتبولون محمد علی‌سی اولدو. آلمانیادا و خصوصیله آلمان فوتبول فدراسیونونا قارشی سرت تنقیدلر یؤنلدن مسعود اؤزیل آلمانیادا یاشایان تورک و مسلمان آزلیغین سسی اولدو.
مانیفستینده آلمانیا‌داکی عیرقچی‌لیگه، ایکی یوزلو یاناشمایا دقت چکدی و اؤزونون هم تورکیه اوچون هم ده آلمانیا اوچون دؤیونن اوریی اولدوغونو وورغولادی. اؤزلین اردوغانلا فوتوسونو مودافعه ائتمه‌سی و آلمایینا اوچون قازاندیغی او قدر غلبه‌یه باخمایا‌راق عیرقچی یاناشما‌لارا معروض قالدیغینی دقیق شکیلده ایضاح ائتمه‌سی اصلینده آلمانیادا یاشایان تورک‌لرین دوشونجه‌لرینی و دویغولارینی دا تمثیل ائدیر. نتیجه‌ده خصوصیله آلمانیادا یاشایان تورک‌لر سوسیال مئدیادا مسعود اؤزیلی قهرمان کیمی تبریک ائتدی‌لر.
اؤزیلین مانیفستی نه قدر ده آلمانیا‌داکی تورک‌لر و مسلمان‌لارین سسی اولسا دا و اونلارین دوشونجه‌لرینی و دویغولارینی تمثیل ائتسه ده، نه اوچون بیر فوتبولچونون و نه اوچون بیر میللت وکیلی‌نین تورک و مسلمان آزلیغین دوشونجه و دویغولارینی تمثیل ائتمه‌دیگی سوا‌لی اهمیت داشیییر. آلمان مجلیسینده اولان تورک اصیللی میللت وکیل‌لری‌نین و آلمانیا‌داکی سیاسی پارتی لرین تورک و مسلمان آزلیغی تمثیل ائتمه‌مه‌سی و اونلارین دردلرینه حل یولو تاپماق اوچون جهد گؤسترمه‌مه‌سی آلمانیا اوچون جدی پروبلئم‌دیر. آلمانیادا عیرقچی‌لیک و ایسلاموفوبی آرتماقدا داوام ائدرکن، دیگر طرفده بو اؤلکه‌دکی تورک‌لری و مسلمان‌لاری تمثیل ائدن هئچ بیر میللت وکیلی یوخ‌دور.
خصوصیله آلمانیا‌داکی بو ضدیته گؤره اؤلکه‌ده یاشایان تورک‌لرین و مسلمان‌لارین حاق‌لارینی قوروماق و اونلارا ضمانت وئرمک اوچون تورکیه‌نین آلمانیادا داها فعال و تأثیرلی سیاست یوروتمه‌سی واجیب‌دیر. تورکیه‌نین آلمان توپلومو ایچری سینده وارلیغینی حیس ائتدیرمه‌سی و آلمانیا‌داکی تورک‌لر و مسلمان‌لار اوچون موباریزه آپارماسی بو اؤلکه‌دکی تورک‌لری و مسلمان‌لاری جسارتلندیره‌جک و حقیقت‌لری توپلومون اوزونه ووران یئنی مسعود اؤزیل‌لر چیخا‌جاق‌دیر. تورکیه آلمانیادا تأثیرلی و فعال سیاست یوروتمه‌یه‌جگی تقدیرده ایسه آلمانیا‌داکی تورک‌لر و مسلمان‌لار عیرقچی‌لیک و ایسلاموفوبینین آرتماقدا داوام ائتدیگی آلمان توپلومو ایله قارشی-قارشییا قالا‌جاق‌دیر.
