گوندم آنالیز: 13
"زیتون دالی" عملیاتی چرچیوهسینده عفرین بؤلگهسینین تروریستلردن آزاد ائدیلمهسیندن سونرا سیویل لر ائولرینه قاییتماغا باشلادی.
"زیتون دالی" عملیاتی چرچیوهسینده عفرین بؤلگهسینین تروریستلردن آزاد ائدیلمهسیندن سونرا سیویل لر ائولرینه قاییتماغا باشلادی. بؤلگهدکی پ.کا.کا/پ.ی.گ ظلموندن قاچیب تورکیهیه سیغینان سوریه-لی قاچقینلار پروبلئمی موباحیثه اولوندوغو و خصوصیله امریکا و آوروپا بیرلیگی اؤلکهلرینده عرقچیلیک آرتیردیغی بیر زاماندا تورکیهنین سوریه-ده ایزلدیگی سیاست سوریه-لیلرین کؤنوللو اولاراق ائولرینه قاییتمالاریندا ان بؤیوک عامل اولدو.
"فرات قالخانی" عملیاتی ایله آزاد اولونان بؤلگهلرده تورکیهنین ائتدیگی اینسانی یاردیملار، قوروجو فعالیتلری، آزادلیق و اعتیماد موحیطی سایهسینده تورکیهده قوناق اولان سوریه-لی قاچقینلارین اؤلکهلرینه گئری قاییتدیقلارینی موشاهیده ائدیریک. تورکیه سوریه-ده بیر طرفدن ترورلا موباریزه آپارارکن، دیگر طرفدن ده سیویل لرین تهلوکهسیزلیگی اوچون ایمکان یارادیر. "فرات قالخانی" عملیاتی نتیجهسینده آزاد ائدیلن بؤلگهلره سوریه-دن کناردا اولان200 مینه یاخین قاچقینین ائولرینه قاییتدیغی بیلدیریلیر. آیریجا سوریه داخیلیندکی دیگر بؤلگهلردن مینلرله سیویلین شیمالی حلبه گلیب "فرات قالخانی" عملیاتی نتیجهسینده آزاد ائدیلن بؤلگهلره یئرلشدیگی موشاهیده اولونور.
اسد رژیمینین دمشق و اطرافیندا محاصرهیه آلدیغی بؤلگهلردکی سیویللر تورکیهنین ترور عنصورلریندن آزاد ائتدیگی شیمالی حلب بؤلگهسینه گلیب. همچنین سوریه-نین موختلیف بؤلگهلرینده یاشانان ظلمدن قاچان دینج ساکینلرین ده "فرات قالخانی" عملیاتی نتیجهسینده آزاد ائدیلن بؤلگهلره سیغیندیغی اؤنملی بیر تفررواتدیر.
تورکیه سوریه داخیلینده آپاردیغی عملیاتلار ایله سادهجه اؤز میللی تهلوکهسیزلیگینی تامین ائتمیر، بو آدیمی ایله همین زاماندا سوریه-لی اوچون یئنی بیر اومید منبعیدیر و اونلار اوچون تهلوکهسیز حیات شرایطی یارادیر. مثلا امریکانین پ.کا.کا/ی.پ.گ سلاحلیلاری ایله تابکا، رقه و دیرالزوردا آپاردیغی عملیاتلاری زامانی بؤلگهدن کؤچ ائتمک مجبوریتینده قالان یاخود پ.کا.کا/ی.پ.گ طرفیندن کؤچ ائتدیریلن سیویللرین "فرات قالخانی” عملیاتی ایله آزاد اولونان بؤلگهلره گلیب یئرلشدیکلری معلومدور.
امریکانین دیرناقاراسی ترور ایله موباریزه بهانهسیله سوریه-ده پ.کا.کا/ی.پ.گ-یه ایمکان یاراتدیغی بؤلگهلره سیویل لرین قاییتماسی، حتی اؤلکهدن کناردا یاشایان قاچقینلارین گئری قاییتماسی گوندمده یوخدور. امریکانین پ.کا.کا/ی.پ.گ-نین نظارتینه کئچمهسینه ایمکان یاراتدیغی بؤلگه "فرات قالخانی" عملیاتی ایله آزاد ائدیلن بؤلگهلردن قات-قات بؤیوک اولماسینا باخمایاراق، سیویل لرین گئری قاییتماق عوضینه بؤلگهده اولان سیویللر اؤلکه خاریجینه یاخود شیمالی حلبه قاچیرلار.
همین شکیلده اسد رژیمی و روسیانین بؤیوک قتل عام لار حیاتا کئچیرهرک اله کئچیردیکلری حمص، زابادانی، داراییا یاخود دا حلب کیمی بؤیوک یاشاییش یئرلری هله ده خارابا شهرلر کیمی قالماقدا داوام ائدیر.
سوریه داخیلینده سیویل لرین اؤلکه خاریجیندن بئله گئری قاییتدیغی یئگانه بؤلگه "فرات قالخانی" ایله آزاد ائدیلن بؤلگهلردیر. "زیتون بوداغی" عملیاتی ایله آزاد ائدیلن عفرین بؤلگهسینه ده دینج اهالی و قاچقینلار تهلوکهسیز شکیلده گئری قاییدا بیلهجکلر. "فرات قالخانی" عملیاتی ایله آزاد ائدیلن تل رفعت و اطرافیندا پ.کا.کا/ی.پ.گ طرفیندن زوراکیلیقلا کؤچ ائتدیریلن یوز میندن آرتیق اینسان یاشاییر. ائولرینه قاییتماق ایستهین بو ساکینلر تورکیه و آزاد سوریه اردوسو قوهلرینین تل رفعت و اطرافینی پ.کا.کا/ی.پ.گ سیلاحلاریندان تمیزلهییب سیویل لرین و قاچقینلارین ائولرینه قاییتمالاری اوچون نوماییشلر کئچیریرلر. تورکیه ایسه تل رفعت-لیلرین ائولرینه قاییدا بیلمهسی اوچون لازیم اولان آدیملاری آتماغا باشلادی.
آلمانیادا سوریه-لی قاچقینلار بارهسینده موباحیثه لر اؤنملی گوندم مادهسیدیر. خصوصیله ایفرات ساغچی پارتی AfD سوریه-لی قاچقینلارین آلمانیادا اولماسینی ایستمیر. همین پارتی سوریه-ده بیر هئیت گؤندردی و اسد رژیمی ایله قاچقینلارین مجبوری اولاراق رژیمین نظارتیندکی بؤلگهلره گئری قاییتماسی اوچون گؤروشلر کئچیردی. لاکین آلمانیادا ایجتیمایت بو دوشونجهیه رغبت ائتمهدی و قاچقینلارین اسد رژیمینین نظارتیندکی بؤلگهلره گئری قاییداجاغی تقدیرده اونلاری موختلیف تهلوکهلرین گؤزلهدیگینی بیلدیردی. خصوصیله اسد رژیمینین سوریه-لی قاچقینلاری خاین کیمی گؤرمهسی، ایشگنجه وئرمهسی و زوراکیلیقدان ایستیفاده ائتمهسی بو فیکرین نه قدر اینسانی دیرلره ضدی فیکیر اولدوغونو گؤستریر.
تورکیه سیویل لرین و قاچقینلارین ائولرینه قاییتماسی اوچون ترور عنصورلاریندان آزاد ائتدیگی بؤلگهلرده گوون و آزادلیق موحیطی یاراتدیغی اوچون قاچقینلار کؤنوللو اولاراق گئری قاییدیر. همین شکیلده عراق داخیلینده پ.کا.کا-نین مؤجودلوغونا سون قویماق اوچون سینجارا احتیمال اولونان حربی عملیات بئله سیویللرین ائولرینه قاییتمالارینا ایمکان یاراداجاقدیر. سینجار بؤلگهسینین داعش طرفیندن هوجوما معروض قالماسیندان سونرا یزیدیلرین چوخو داعش-دن قاچا بیلیبلر. لاکین داعش-ین بؤلگهدن تمیزلنمهسینه باخمایاراق، یزیدیلرین ائولرینه قاییتماسینا مانع اولور. تورکیه عراق مرکزی حکومتیله بیرلیکده سینجاری پ.کا.کا ترویستلریندن آزاد ائدجگی تقدیرده یزیدیلرین بؤیوک حیسهسی ائولرینه قاییدا بیلهجکلر. تورکیه حیاتا کئچیردیگی بوتون حربی عملیاتلاردا داغیدیجی بیر گوج یوخ، تاسیس ائدیجی بیر قوه اولدوغونو ثبوتا یئتیرمیشدیر.
تورکیهنین سیاست، ایقتیصادیات و جمعیت آراشدیرمالاری فوندو-ستا-نین آراشدیرماچی یازاری جان آجونون عفرین ظفریله باغلی فیکیرلرینی تقدیم ائتدیک.