گوندم آنالیز 3
سوریه مسئلهسیله باغلی اولاراق آستانا پروسئسینده تورکیه، روسیا و ایرانین ضمانت لیگینده یئنی آدیملار آتیلماقدا داوام ائدیر.
سوریه مسئلهسیله باغلی اولاراق آستانا پروسئسینده تورکیه، روسیا و ایرانین ضمانت لیگینده یئنی آدیملار آتیلماقدا داوام ائدیر. همین چرچیوهده بو اؤلکهده گرگینلیگی آزالتماق اوچون یئنی آدیملار آتیلدی. آستانا پروسئسی سوریه-ده 6-جی ایلی باشا چاتان توققوشمالارا سون قویولماسی و باریش آدیندان ایندیه ده ک آتیلمیش ان اؤنملی آدیمدیر. 3 اؤلکه آراسیندا قبول ائدیلن راضیلاشما ایله سوریه-نین موختلیف یئرلرینده چاتیشمازلیک بؤلگهلری اعلان ائدیلدی، همچنین سوچی-ده سوریه-ده کی بوتون ائتنیک و مذهب قروپلارینین ایشتیراکی ایله میللی باریش کنگرهسینین قورولماسی قرارا آلیندی. آنجاق سوریه-ده کی موناقیشهسیز بؤلگهلر داخیلینده یئرلشن ادلیب بؤلگهسینده باش وئرن سون توققوشمالار آستانا پروسئسینین حیاته کئچیریلمهسینی چتینلشدیریر.
اسد رژیمی و رژیم طرفداری میلیسلرین روسیانین هاوا دستکی ایله باشلاتدیقلاری ادلیب عملیاتیندا موختلیف یاشاییش یئرلرینی اله کئچیردیکلری موشاهیده اولوندو. ابو ظهور هاوا لیمانینا یاخینلاشان رژیم طرفداری سلاحلیلارین ایره لی له یشی سوریه-لی موخالیفتین قارشی هوجوملاری نتیجهسینده قیسمی ده اولسا آلیندی. تورکیهنین خاریجی ایشلر ناظیرلیگی اسد رژیمینین ادلیب عملیاتینین گرگینلیگی آزالتما بؤلگهسیله باغلی راضیلاشمایا ضد اولدوغونو بیلدیردی.
تورکیه روسیادان اسد رژیمینه تضییق ائدهرک عملیاتلارین دایاندیریلماسینی ایستییر. ادلیبدکی تورکیه دستکلی سوریه-لی موخالیفت قروپلارینین حرکته کئچهرک قارشی هوجوم باشلاتماسی دا همین چرچیوهده روسیا و اسد رژیمینه خبردارلیق کیمی دیرلندیریله بیلر.
دیگر طرفدن جمهور باشقانی رجب طیب اردوغانین سون گونلردکی عفرین ایله باغلی آچیقلامالاری احتیمال اولونان عفرین عملیاتینا دایر گؤزلنتیلری آرتیردی. اردوغان عفرین و منبیچ عملیاتینین هر آن باشلایا بیله جگینی سؤیلهدی: "اومید ائدیرم کی، صاباح، بیریسیگون، قیسا مودتده عفرین و منبیچدن باشلایاراق سوریه-ده کی دیگر ترور یووالارینی دا تک-تک داغیداجاغیق". جمهور باشقانینین آچیقلامالاریندان علاوه Feylak uş Şam سؤزچوسونون 20 مین آزاد سوریه اردوسو منسوبونون عفرین عملیاتی اوچون حاضیر اولدوغونو آچیقلاماسی دا اهمیت کسب ائدیر.
جمهور باشقانی اردوغانین آیریجا امریکایا یؤنلدیلمیش "تئرررورلا آرامیزدا دایانمایین، قاتیل سورولریله آرامیزا گیرمیین. عکس تقدیرده اورتایا چیخا بیلهجک آرزو ائدیلمهین حادثهلردن بیز مسئول دئییلیک. ترور تشکیلاتینین دوشرگلریندکی بایراقلارینیزی اؤزونوز گؤتورون کی، او بایراقلاری بیز سیزه تحویل وئرمک مجبوریتینده قالمایاق. تروریستلر اوزریندکی نیشانهلرینیزی سؤکوب گؤتورون کی، تروریستلر ایله بیرلیکده اونلاری دا تورپاغا قویلاماق مجبوریتینده قالمایاق." آچیقلامالاری تورکیهنین قرارلی اولدوغونو گؤسترمهسی باخیمیندان چوخ اؤنملی و گوجلو ایفادهلر ایدی.
امریکانین سون آچیقلامارینا گوره، ی.پ.گ-نین نظارتینده اولان بؤلگهلرده 30 مین نفرلیک یئنی بیر اردو قورماغی پلانلاشدیریر. ائله گؤرونور "سرحد تهلوکهسیزلیگی قوهسی" اولاراق آدلاندیریلان تشببوس امریکانین سوریه-نین تورپاق بوتؤولوگوندن واز کئچیب و ی.پ.گ ایله تهلوکهلره قارشی قبول ائتدیکلری قایدالاری داعش-دن سونراسی اوچون ده داوام ائتدیرمگی پلانلاشدیریر. نهایت تورکیه، روسیا، ایران، سوریه-لی موخالیفلر و اسد رژیمی امریکانین اردو قورما پلانینا سرت رئاکسیا گؤستردیلر.
آستانا پروسئسینده تورکیه، روسیا و ایرانین ضمانتیندکی پروسئسین اساس فیکری سوریه-نین تورپاق بوتؤولوگونو قوروماقدیر. امریکانین سوریه، عراق و تورکیه سرحدینده یئرلشدیریلمک اوچون ی.پ.گ-دن تشکیل تاپاجاق یئنی بیر اردو قورما پلانی بو مینوالدا آستانا پروسئسیله دابان-دابانا ضد یاناشمادیر. سوریهت-ده کی توققوشما و محاربه موحیطینده بیر ترور قورشاغینی داعش ایله موباریزه آدی آرخاسیندا آرا یئره گتیرمهیه جهد ائدن امریکا سوریه ساحهسینده گئدهرک تنهالاشیر. امریکا یانلیزلیغینی سعودی عربیستانی و بیرلشمیش عرب امیرلیکلری کیمی کؤرفز اؤلکهلری و ایسرائیل اوزریندن اؤرتمهیه چالیشیر.
عفرین-ده کی ی.پ.گ سلاحلیلارین امریکادان چوخ روسیا ایله یاخین علاقهده اولدوغو و بؤلگهلرینده روس حربی بازالارینی یئرلشدیردیکلری معلومدور. عفرین عملیاتی اوچون امریکانین حمایهسیندن چوخ روسیانین حمایهسی ی.پ.گ-نی قورویوردو. جمهور باشقانی اردوغانین آچیلامالاریندان سونرا روسیادان ایفاده اولاراق داها تمکینلی رئاکسیالار گؤستریلدی. پنتاگون سؤزچوسو ایسه بیر ژورنالیستین سوالی قارشیسیندا عفرین بؤلگهسینین امریکانین عملیاتلار ساحهسینه گیرمه دیگینی بیلدیردی.
تورکیهنین عفرین بؤلگهسیندکی ی.پ.گ تشکیلاتلانماسینا قارشی آزاد سوریه اردوسو قوهلریله بیرلیکده عملیات باشلاتماسی هر آن گؤزلنیر. عفرین عملیاتینین دئتاللارینا دایر معلومات یوخدور، آنجاق احتیمال کی، عفرین اطرافینداکی بؤلگهلر اله کئچیریلهرک عفرین-ده کی ی.پ.گ-نین موجودلوغو محاصرهیه آلیناجاق. عفرین اطرافینداکی بؤلگهلر ی.پ.گ-نین نظارتینده اولسا دا اهالی عمومی لیکده عربدیر. ی.پ.گ-نین محاصرهسی نتیجهسینده بؤلگهدکی سیویل لر ائو-ائشیکلرینی ترک ائدهرک تورکیه سرحد منطقهسیندکی دوشرگهلرده یاشاییر. دوشرگهلرده یاشایان یئرلی خالق اوزون مودتدیر تورکیه و آزاد سوریه اردوسوندان عفرین اطرافینداکی یاشاییش منطقهلرینین ی.پ.گ-دن خلاص ائدیلمهسینی ایستییر.
عمومی معنادا دئمک اولار کی، سوریه-ده دینامیک بیر پروسئس موجوتدور. آستانا پروسئسی مانعهلره باخمایاراق داوام ائدیر. اسد رژیمینین پوزونتولارینا باخمایاراق ضامین اؤلکهلر پروسئسی داوام ائتدیرمهیه و قارشیلیقلی گوون موحیطی یارانماسینا سعی گؤستریرلر. دیگر طرفدن امریکانین ی.پ.گ واسطهسیله قورماغی پلانلاشدیردیغی اردویا قارشی روسیا، ایران، تورکیه، سوریه-لی موخالیفت و اسد رژیمی سرت رئاکسیا گؤستردی.
تورکیهنین سیاست، ایقتیصادیات و جمعیت آراشدیرمالاری فوندو-ستا-نین آراشدیرماچی یازاری جان آجونون فیکیرلرینی تقدیم ائتدیک .