آمریکادان ایرانین سوچلامالارینا جاواب گلدی
آغ ائو میللی گوونیک ایله‌تیشم مشاویری جان کربی، تله‌کنفرانس یولویلا تشکیل ائتدیگی مطبوعات بیلگیلندیرمه توپلانتیسیندا ایرانلا باغلی گوند‌می دگرلندیردی
آمریکا بیرلشمیش دؤولتلری، ایران جمهورباشقانی ابراهیم رئیسینین سیراغا گون هلیکوپتر قضاسیندا حیاتینی ایتیرمه‌سیندن "آمریکا تحریملرینین سبب اولدوغو" یولوندا‌کی سوچلامالارین اساسسیز اولدوغونو بیلدیردی.
آغ ائو میللی گوونیک ایله‌تیشم مشاویری جان کربی، تله‌کنفرانس یولویلا تشکیل ائتدیگی مطبوعات بیلگیلندیرمه توپلانتیسیندا ایرانلا باغلی گوند‌می دگرلندیردی.
کربی، ایران جمهورباشقانی ابراهیم رئیسینین بیر هلیکوپتر قضاسیندا حیاتینی ایتیرمه‌سیندن اؤترو کدر دویدوقلارینی و ایران خالقینا باش‌ساغلیغی دیلکلرینی چاتدیردیقلارینی سؤیله‌دی.
بونونلا بیرلیکده کربی، ایرانین بؤلگه‌ده‌کی عنصولارا وئردیگی دستگین جدی ضررلره سبب اولدوغونو، ۷ اکتبرداکی حماس سالدیریلارینا ایرانین دستک وئردیگینی و دولاییسیلا رئیسینین اللرینین قانلی اولدوغونو ادعا ائتدی.
جان کربی، رئیسینین هلیکوپترینین دۆشمه‌سینین مسئوللاریندان بیرینین، بو اؤلکه‌نین مولکی هاواچیلیق عنصورلارینا تحریم تطبیق ائد‌ن آمریکا اولدوغونو ادعا ائد‌ن اؤنجه‌کی ایران خاریجی ایشلر باخانی محمد جواد ظریفین آچیقلامالارینین ایسه "اساسسیز" اولدوغونو سؤیله‌دی.
کربی، "(بو حادثه‌ده) آمریکا تحریملرینین سبب اولدوغو ادعاسی تامامیله اساسسیزدیر. قضانین سببی هله دقیق دئییل، هئچ اولماسا بیزه آچیق دئییل. وطنداش هاواچیلیق داخیل اؤز تجهیزاتینین گوونیلیرلیک و امنیتیندن اؤزلری مسئولدور. بو سببله (ادعالار) اساسسیزدیر" دئدی.
آمریکا‌لی مشاویر، ایرانین بو حادثه‌ده ده آمریکامی مسئول توتماق اوچون بیر یول تاپماغا چالیشدیغینی و بونون سورپریز اولمادیغینی ایفاده ائتدی.
اؤنجه‌کی ایران خاریجی ایشلر باخانی ظریف، جمهورباشقانی ابراهیم رئیسی و خاریجی ایشلر باخانی حسین امیرعبداللهیانین حیاتینی ایتیردیگی هلیکوپتر قضاسیندا "اصل مسئوللاریندان بیرینین" اؤلکه‌نین سیویل هاواچیلیق بؤلومونه تأثیر ائد‌ن تک طرفلی تحریملر تطبیق ائد‌ن آمریکا اولدوغونو ساوونموشدو.
اؤته یاندان، آمریکا خاریجی ایشلر باخانلیغی سؤزچوسو متیو میلر، ایران جمهورباشقانی ابراهیم رئیسی و خاریجی ایشلر باخانی حسین امیرعبداللهیان ایله یانینداکیلارین حیاتینی ایتیردیگی هلیکوپتر قضاسییلا باغلی آجیقلاما وئردی.
سؤزچو میلر، آچیقلاماسیندا، "آمریکا، ایران جمهورباشقانی ابراهیم رئیسی، خاریجی ایشلر باخانی حسین امیرعبداللهیان و دیگر هیئت عضولرینین بیر هلیکوپتر قضاسیندا اؤلومو سببی ایله رسمی اولاراق باش‌ساغلیغی دیلکلرینی سونار" ایفاده‌لرینی ایشلتدی.
جمهورباشقانی رئیسی، سیراغا گون ایران-آذربایجان سرحدینده سد آچیلیش مراسیمیندن قاییدارکن، یانیندا خاریجی ایشلر باخانی حسین امیرعبداللهیان و بعضی مسئوللارلا هلیکوپتر قضاسی گئچیره‌رک حیاتینی ایتیرمیشدی.
ایلگیلی‌لی خبرلر
کالیفورنیا ایالتینده اوچاق قضاسی
تک محریکلی اوچاق کالیفورنیانین قوزئیینده داغلیق اراضیده قضایا اوغراییب
