آنتونی بلینکن بیر داها اوکراینا گئدیب
بلینکن: من بو گون کی‌یفه قاییتدیم کی، اوکراینین آزادلیغینی روسیه‌نین تجاووزوندن مودافیعه ائدن اونا سارسیلماز دستییمیزی نوماییش ائتدیرک
آمریکا خاریجی ایشلر ناظیری آنتونی بلینکن 2022-جی ایلین فوریه‌سیندن روسیه ایله موحاریبه وضعیتینده اولان اوکراینا دستیینی نوماییش ائتدیرمک اوچون بیر داها بو اؤلکه‌نین پایتخاتی کی‌یفده...
آنتونی بلینکن سوسیال مئدیا پلاتفورمونداکی پایلاشیمیندا اوکراینی دستکلدیگینی تکرارلاییب، "من بو گون کی‌یفه قاییتدیم کی، اوکراینین آزادلیغینی روسیه‌نین تجاووزوندن مودافیعه ائدن اونا سارسیلماز دستییمیزی نوماییش ائتدیرک." دئدی.
آمریکا دؤولت دپارتامانینین سؤزچوسو متیو میلر یازییا ایستینادن بلینکنین کی‌یفده اوکراین پرزیدنتی ولادیمیر زلنسکی و دیگر یوکسک سوییه‌لی لیدرلرله گؤروشه‌جیینی بیلدیریب.
میلر قید ائدیب کی، بلینکن لیدرلرله آمریکانین یئنی تهلوکه‌سیزلیک و ایقتصادی یاردیمینین تأثیرینی و اوکراینین ایقتصادی دیرچلیشینه دستک سَعیلرینی موذاکیره ائده‌جک.
سون گونلر روسیه اوکراینین قوزئی سرحدی خارکوفا هوجوملارینی گوجلندیریب و بو بؤلگه‌نی یئنیدن جبهه خطینه داخیل ائدیب.
روسیه اوردوسو سون بیر نئچه گونده خارکوف ویلایتینده 10-دان چوخ یاشاییش منطقه‌سینین کنترلونو آلیب. اوکراین روسیه‌نین گوجلنن هوجوملارینا قارشی باتیدان حربی دستیین آرتیریلماسینی ایستَییر.
