بلینکن: ایسرائیل ایله باغلی هئچ بیر "قیرمیزی خط" یوخدور
آمریکا ناظیری اوشاقلارین، قادینلارین و کیشیلرین اؤلدورولمه‌سینی نظره آلاراق، «ایسرائیلین بعضی حاللاردا اولوسلارآراسی اینسانی حوقوقا اویغون حرکت ائتمدیگینی دوشونمک آغلاباتاندیر» دئییب
آمریکا خاریجی ایشلر ناظیری آنتونی بلینکن ایسرائیلین رفحه هرطرفلی هوجوم تشکیل ائتمه‌سینی ایستمه‌دیکلرینی، لاکین ایسرائیل ایله باغلی هئچ بیر "قیرمیزی خط"لرینین اولمادیغینی بیلدیریب.
آنتونی بلینکن ان‌بی‌سی-ده یاییملادیغی پروگرامدا رهبرلیگین ایسرائیلین رفحه هرطرفلی هوجومونا قارشی اولدوغونو ایفاده ائده‌رک، پرزیدنت جو بایدنین بو مؤوضوعدا دقیق مؤقعینی خاطیرلاتدیغینی بیلدیریب.
آمریکا خاریجی ایشلر ناظیری ایسرائیلین هله ده اونلارا اعتیبارلی پلان تقدیم ائتمدیگینی و بئله بیر پلان اولمادان 1.5 میلیون فیلیسطین‌لی مولکی شخصین سیغیندیغی رفحه هوجومون آغیر نتیجه‌لره سبب اولاجاغینی وورغولاییب.
اکتبرین 7-دن (غزه‌یه هوجوملارین باشلادیغی واختدان) ایسرائیله هر معنادا ان جیدّی دستیی وئرن بایدن رهبرلیگینین بو دستیی داوام ائتدیره‌جیینی قید ائدن بلینکن، ایسرائیلین رفحی ایشغال ائده‌جیی تقدیرده آمریکانین سیلاح یاردیمینی دایاندیرما یاناشماسینی دا دَیرلندیردی.
بلینکن، بورادا سیاسی بیر پرسپکتیوه صاحیب اولدوقلارینی، آنجاق بونون قیرمیزی خط اولمادیغینی ایفاده ائده‌رک، "پرزیدنت بایدنین سیلاحلاری دایاندیرماق تهدیدینی سوروشماق ایستَییرم، بایدنین قیرمیزی خطی تام اولاراق نه‌دیر؟" سوروسونا "باخین، ایسرائیله گلینجه، بورادا قیرمیزی ختلردن دانیشمیریق». جاوابینی بیلدیردی.
سی‌بی‌اس تلویزیونونون قوناغی اولدوغو پروگرامدا آمریکا ناظیری اوشاقلارین، قادینلارین و کیشیلرین اؤلدورولمه‌سینی نظره آلاراق، «ایسرائیلین بعضی حاللاردا اولوسلارآراسی اینسانی حوقوقا اویغون حرکت ائتمدیگینی دوشونمک آغلاباتاندیر» دئییب.
دیگر طرفدن، آنتونی بلینکن ایسرائیلین مودافیعه ناظیری یوآو گالانت ایله تلفون دانیشیغی کئچیره‌رک، رفحه بؤیوک بیر هوجوما قارشی اولدوقلاری مئساژینی تکرارلادی و ایسرائیل ناظیریندن غزه‌یه یاردیملارین داخیل اولماسینی آسانلاشدیرماسینی ایسته‌دی.
آمریکا پرزیدنتی جو بایدن چرشنبه گونو رفحه بؤیوک بیر هوجوم اولاجاغی تقدیرده ایسرائیله سیلاح یاردیمینی دایاندیراجاغینی بیلدیریب و بو سؤزلره هم جمهوریتچیلر پارتیسی، هم ده ایسرائیل عکس‌العمل گؤستریب.
