دونالد ترامپ مهاجیرلره حیوان دئدی

آمریکانین کئچمیش پرزیدنتی دونالد ترامپ اؤلکه‌یه غیری-قانونی یوللارلا داخیل اولان و قتل کیمی جینایتلر تؤردن غیری-قانونی مهاجیرلرله ”اونلار اینسان دئییل، حیواند‌یرلار“ دئییب.

جمهوریتچیلر حیزبینین جمهورباشقانلیغی نامیزدی دونالد ترامپ میشیگان ایالتینده سئچکی چیخیشی زامانی بیر گروه پولیس امکداشی ا‌یله شکیل چکدیررکن جینایتله موباریزه‌ده یول وئریلن نقصانلارا توخونوب و آمریکادا طلبه‌ قیزینی ”باربارجاسینا“ اؤلدورن غیری-قانونی مهاجیر‌لری ”حیوان“ آدلاندیریب.

ترامپ "جورجیا ایالتینده 22 یاشلی ساغلیق خیدمتی طلبه‌سی غیری-قانونی مهاجیر حیوان طرفیندن وحشیجه‌سینه قتله یئتیریلیب. دئموکرات‌لار 'خاهیش ائدیریک، اونلارا حیوان دئمیین، اونلارا اینسان دئیین' دئدی‌لر. من 'اینسان دئییل‌لر' دئدیم. اونلار اینسان دئییل، حیواند‌یرلار." ایفاده‌سینی ایشلدیب.

آمریکا پرزیدنتی جو بایدنی اؤلکه‌نین گونئی سرحدینده تهلوکه‌سیز‌لیک تدبیر‌لرینین یئترسیز اولماسی‌ ایله باغلی تنقید ائدن ترامپ، "5 نوامبر سئچکیلرینده غالیب گلمسک، اؤلکه‌میزین محو اولاجاغینی دوشونورم" دئییب.

ترامپ سئچکی چیخیش‌لاری‌نین بیر چوخوندا مکزیک سرحد‌ینی غیری-قانونی کئچن مهاجیرلر آرا‌سیندا اؤز اؤلکه‌لرینده‌کی حبس‌خانا‌لار‌دان و روحی خسته‌خانا‌لار‌دان قاچان چوخلو سایدا ”قاتیل‌لر، نارکوتیک ساتیجی‌لاری، روحی خسته‌‌لر و ترورچو‌لار“ اولدوغونو و بو اینسان‌لارین آمریکادا زوراکیلیق (خشونت) جینایتلر‌ینی آرتیریر.

فوریه‌نین 22-ده جرجیا ایالتینده ساغلیق خیدمتی طلبه‌سی اولان 22 یاشلی لاکن ریلی-‌نین ونزوئلالی غیری-قانونی مهاجیر طرفیندن اؤلدورولمه‌سی خبری اؤلکه‌ مئدیا‌سیندا گوندم اولوب و آنتی-مهاجیر گروه‌لارین قارشی حرکتینه سبب اولوب.

اؤتن آی 25 یاشلی روبی گارسیا آمریکادا غیری-قانونی اولدوغو ادعا ائدیلن شخص طرفیندن میشیگان ایالتینده اؤلدورولوب.