اوکراین: روسیه‌‌نین ترور حادیثه‌سیندن خبری واردی

اوکراین باش ایستیخبارات اداره‌سینین دیرکتورو کیریل بودانوو ادعا ائدیب کی، روسیه‌ فوریه‌نین 15-دن کروکوس سیتی هال‌دا باش وئرن ترور حادیثه‌سیندن خبردار اولوب.

بودانووون سؤزلرینه گؤره، روسیه‌ ایستیخباراتی حادثه‌نین بوتون تفرروعاتلارینی، مثلاً، هوجوم ائدنلرین هارادان گله‌جیینی، روسیه‌یه هانسی ایکی اؤلکه‌دن گیره‌جکلرینی اوولجه‌دن بیلیردی.

بودانوو، "روسیه‌ ان آزی 15 فوریه‌ 2024-جو ایلدن بری هوجوما حاضرلیقدان خبری واردی. اجازه‌ وئرین، سیزه داها چوخ معلومات وئریم - بو معلومات تشکیلاتین سوریه ایستیخباراتیندان کئچرک مسکویا چاتیب." دئدی.

اوکراین باش ایستیخبارات اداره‌سینین دیرکتورو روسیه‌نین هوجوما نییه گؤز یومماسی‌ ایله باغلی ایکی احتیمال ایرلی سوروب: "بیرینجیسی - کرملین قوله‌لرینده‌کی عادی دؤیوشلردن بیری - اولا بیلسین کی، بیر نئچه نفری وظیفه‌دن اوزاقلاشدیر‌ماق اوچون تشکیل اولونوب. ایکینجیسی - اونلار نه باش وئره‌جیینی حقیقتا حسابلامادیلار. اونلار داها کیچیک بیر شئی گؤزلییردیلر و سونرا اوکراینی گوناهلاندیراجاقدیلار".

مارسین 22-ده بیر گروه ترورچو ” کروکوس سیتی هال“دا تاماشاچیلارا آتش آچیب و بینانی یاندیریب. ترور حادیثه‌سی نتیجه‌سینده آزی 143 نفر اؤلوب، 180 نفر یارالانیب، 95 نفر ایتکین دوشوب.

هوجوما گؤره مسئولییتی داعش-خوراسان ترور تشکیلاتی اوزرینه گؤتوروب. آمریکا تئزلیکله هوجومون بو تشکیلات طرفیندن حیاتا کئچیریلدیگینی تصدیقلدی. بونونلا بئله‌، کرملین هوجومون آرخاسیندا اوکراینین اولا بیله‌جیینی دوشونور.