آمریکا مریلند ایالتینده یوک گمیسینین وورماسی نتیجه‌سینده کؤرپو چؤکوب

آمریکا مریلند ایالتینده یوک گمیسینین وورماسی نتیجه‌سینده چؤکن فرانسیس اسکات کی کؤرپوسوندن چایا دوشن 8 نفردن 2-سی خلاص ائدیلرکن، تاپیلمیین 6 نفرین اؤلدویو دئییلیر.

پولیس رسمیلری، دونن یئرلی واختلا ساعت 01:30 جیواریندا یوک گمیسینین فرانسیس اسکات کی کؤرپوسونون سوتونلاریندان بیرینه چیرپیلماسی نتیجه‌سینده پاتاپسکو چایینا دوشن 8 انشاءات ایشچیسیندن 6-نین ساغ قالماسی اومیدلرینین ایتدیگینی آچیقلاییب.

ساحل محافظه‌ بؤلمه‌سیندن شنون گیلریت آخشام کئچیریلن مطبوعات کونفرانسیندا، "حاضردا بو اینسانلارین هئچ بیرینی ساغ تاپاجاغیمیزی دوشونموروک." دئدی.

رسمیلر۶ ایشچینین آختاریشلارینین دالغیجلارلا داوام ائتدیریله‌جیینی قید ائدیب.

ایش‌وئرن شیرکتین اداره‌چیلریندن اولان جفریی پریتزکر، قضا زامانی ایشچیلرین کؤرپونون اورتا حیصه‌سینده ایشلدیگینی بیلدیره‌رک، تهلوکه‌سیزلییه بؤیوک اهمیت وئردیکلرینی، لاکین کؤرپونون اوچابیلمه‌سینی قاباقجادان گؤره بیلمه‌دیکلرینی وورغولادی.

دیگر طرفدن کؤرپویه چیرپیلان سنگاپور بایراقلی "دالی" یوک گمیسینده اولان 22 مرتبات عضوونون هامیسی خلاص ائدیلیب.

یوک گمیسینین کؤرپویه چیرپمادان قیسا مدت اول یاردیم چاغیردیغی، بئله‌لیکله بالتیمور رسمیلرینین داها چوخ اتومبیلین کؤرپویه گیرمه‌سینه مانع اولدوغو اؤیرنیلدی.

مریلند ایالتینین والیسی وس مور مطبوعاتا آچیقلاماسیندا 1977-جی ایلده انشاء ائدیلن کؤرپونون وضعیتینین قایدالارا اویغون اولدوغونو قید ائدیب.

26 مارس تاریخینده یئرلی واختلا ساعت 01:30 جیواریندا آمریکانین مریلند ایالتینین بالتیمور شهرینده بؤیوک یوک گمیسی فرانسیس اسکات کی کؤرپوسونه چیرپیلیب و ضربه‌دن سونرا گمیده یانغین باشلاییب.

تخمیناً 2.57 کیلومتر اوزونلوغوندا اولان کؤرپونون بؤیوک بیر حیصه‌سی ضربه نتیجه‌سینده چؤکرکن، کؤرپوده اولان چوخلو اتومبیل پاتاپسکو چایینا دوشوب.

مریلند نقلیات ایداره‌سیندن وئریلن آچیقلامادا، فرانسیس اسکات کی کؤرپوسونه گئدن بوتون یوللارین هر ایکی ایستقیامتده نقلیاتا باغلاندیغی بیلدیریلیب.

قضادان سونرا ایالتدا فوق‌العاده‌ وضعیت اعلان ائدیلیب، آختاریش-خیلاص‌ائتمه گروهلاری قضا زامانی کؤرپوده تعمیر ایشلری آپاران 8 انشاءاتچیدان 2-نی خلاص ائدیب.