آمریکا خاریجی ایشلر ناظیری آنتونی بلینکن سعودی عربیستانا سفر ائدیب

سعودی عربیستانینین ولیعهد شاهزاده‌سی محمد بن سلمان آمریکا خاریجی ایشلر ناظیری آنتونی بلینکنله غزه‌ زولاغیندا باش وئرنلری مذاکره‌ ائدیب.

سعودی عربیستانینین رسمی خبر آژانسی اس‌پی‌ای-ین خبرینه گؤره، بن سلمان اؤلکه‌سینه سفر ائدن آمریکا خاریجی ایشلر ناظیری بلینکن‌یله جده‌ده گؤروشوب.

بن سلمان و بلینکن آراسیندا کئچیریلن گؤروشده ایکی‌طرفلی علاقه‌لر و ایکی اؤلکه‌ آراسیندا اَمکداشلیغین عمومی ایستقیامتلری نظردن کئچیریلیب.

گؤروش زامانی غزه‌ زولاغیندا و اطرافیندا باش وئرن حادثه‌لر، حربی هجوملارین دایاندیریلماسی، تهلوکه‌سیزلیک و اینسانی تأثیرلرینین آرادان قالدیریلماسی ایستقیامتینده سعیلر، ائلجه‌ده عمومی بؤلگه‌سل و اولوسلارآراسی اهمیتلی حادثه‌لر مذاکره‌ ائدیلیب.

سعودی عربیستان خاریجی ایشلر ناظرلیگیندن وئریلن آچیقلامایا گؤره، ناظر فیصل بن فرهان دا قوناق ناظر بلینکنله گؤروشوب.

گؤروش زامانی ناظرلر ایکی‌طرفلی علاقه‌لرین موحکملندیریلمسی یول‌لارینی و موختلیف ساحه‌لرده بیرگه اَمکداشلیغی مذاکره‌ ائدیبلر.

ایسرایلین هجوملاری آلتیندا غزه‌ زولاغیندا اَلده ائدیلن آتش‌کس و چوخ سایدا کؤچکون فیلیسطینلینین سیغیندیغی ایسرایلین حدفی اولان رفح‌ده‌کی وضعیتی قیمتلندیرن بن فرهان و بلینکن تعجیلی اینسانی یاردیملارین غزه‌یه داخیل اولماسی اوچون لازیم اولان سعیلری مذاکره‌ ائدیبلر.

ایسرایلین باش ناظری بنیامین نتانیاهو غزه‌نین جنوبونداکی رفح شهرینه قورودان هجوم پلانینی تصدیقلدیگینی و مولکی اهالینین بؤلگه‌دن چیخاریلماسی پلانینی ”تئزلیکله“ تصدیقلیه‌جکلرینی بیلدیریب.

ایسرایلین 7 اکتبردان بری غزه‌ زولاغینا تشکیل ائتدیگی هجوملاردا اَن آزی 14 مین اوشاق و 9 مین 220 قادین اولماقلا 31 مین 923 فیلیسطینلی هلاک اولوب، 74 مین 96 نفر یارالانیب.

داغینتیلار آلتیندا هله‌‌ده مینلرله اؤلو اولدوغو بیلدیریلیر.