ولکر تورک غزه-ده آجلیق‌دان اؤلن‌لرله باغلی آچیقلاما وئریب

بمت-نین اینسان حاق‌لاری عالی کمیساری ولکر تورک غزه-ده آجلیق و یوکلیقدان اؤلن‌لرین ایسراییلین بؤلگه‌یه اینسانی یاردیم و تیجاری محصول‌لاری‌نین گیریشی و پایلانماسینا هرطرف‌لی محدودیت‌لر قویماسی سببیندن باش وئردیگینی آچیقلاییب.

ولکر تورک ایسراییلین شدتلی هوجوم‌لارینا معروض قالان غزه-ده آجلیق ریسکی ایله باغلی یازی‌لی آچیقلاما وئریب.

غزه-ده گؤزلنیلن آجلیغین قارشی‌سی‌نین آلینماسی‌نین واجیب‌لیگینی بیل‌دیرن ولکر تورک بمت-نین بو مسئله ایله باغلی سون خبردارلیق‌لاری‌نین نظره آلینمادیغینی بیلدیریب.

"بو فلاکت اینسان طرفیندن تؤردیلیب و تامامیله قارشی‌سی آلینا بیلر. غزه-ده یوکلیق و آجلیق‌دان اؤلوم حال‌لاری ایسراییلین اینسانی یاردیم و تیجاری محصول‌لاری‌نین اؤلکه‌یه گیریشی و پایلانماسینا هرطرف‌لی محدودیت‌لر قویماسی سببیندن باش وئریر"، -دئیه  ولکر تورک قئید ائدیب.

بو وضعیته اها‌لی‌نین بؤیوک حیسه‌سی‌نین دیدرگین دوشمه‌سی ایله یاناشی، مهم سیویل آلت یاپینین محو ائدیلمه‌سیندن ده قایناقلاندیغینا دقت چکن  ولکر تورک اینسان‌لارین آجلیق قارشی‌سیندا گئتدیکجه چاره‌سیز قالماسی ایله "قانون و نظامین" چؤکدوگونو وورغولاییب.

دیگر طرف‌دن، امریکانین خاریجی ایشلر ناظیری آنتونی بلینکن، ارزاق انبارلارینین سرعتله توکندیگی و اینسان‌لارین آجلیقلا موباریزه آپاردیغی غزه-ده وضعیتله باغلی بون‌لاری سؤیله‌ییب:

"غزه-ده‌کی جمعیتین هامیسی جدی ارزاق تهلوکه‌سیزلیگی ایله قارشی-قارشییا‌دیر" دئییب.

قئید ائدک کی، بلینکن فیلیپین-ین پایتاختی مانیل-ده وئردیگی آچیقلامادا بیلدیریب کی، ایسراییل سیویل اینسان‌لاری قوروماغی و اینسانی یاردیما سون درجه احتیاجی اولان‌لارا کؤمک ائتمگی اولویت حساب ائتمه‌لی‌دیر.