ایسراییل اوردوسو رفح شهرینه قارشی دا هوجوما کئچیب

فیلیسطین ایسراییل اوردوسونون غزه زولاغی‌نین گونئیینده‌کی رفح شهرینه قارشی مارسین 18-ی آخشام راده‌لرینده هوجوما کئچدیگینی، آرا‌لاریندا اوشاق و قادین‌لارین دا اولدوغو 14 فیلیسطین‌لی‌نین حیاتینی ایتیردیگینی آچیقلاییب.

فیلیسطین خاریجی ایشلر ناظیرلیگیندن وئریلن یازیلی آچیقلامادا "فیلیسطین خاریجی ایشلر ناظیرلیگی غزه زولاغی‌نین قوزئییندن و مرکزیندن میلیون‌لارلا کؤچکونون یاشادیغی شهرین ایشغال اولونماماسی ایله باغلی اولوسلار آراسی خبردارلیق‌لارا محل قویمایا‌راق، ایسراییلین رفح شهرینه قارشی قان‌لی هاوا هوجوم‌لارینی و سیستم‌لی داغیدیجی عملیات‌لارینی قطعیت ایله پیسلییر" دئییلیب.

آچیقلامادا ایسراییلین مارسین 18-ی (بازار ارته‌سی) آخشام ساعات لاریندان‌ اعتباراً ایسراییلین رفح شهرینه داغیدیجی هاوا هوجومو تشکیل ائتدیگی و چوخلو سایدا فیلیسطین‌لی‌نین حیاتینی ایتیردیگینه دقت چکیله‌رک، "ایسراییل رفح شهرینه قارشی هوجوما کئچدی و اولوسلار آراسی رئاکسیا‌لاردان ایمتینا ائتمک اوچون بونو اعلان ائتمه‌دی و هئچ کیمدن ایجازه گؤزلمه‌دی" دئییلیب.

آچیقلامایا گؤره، ایسراییل دؤیوش اوچاق لارینین مارسین 18-ی گئجه راده‌لرینده رفح شهری‌نین موختلیف بؤلگه‌لرینه ائندیردیگی هاوا ضربه‌لرینده آرا‌لاریندا اوشاق و قادین‌لارین دا اولدوغو 14 فیلیسطین‌لی حیاتینی ایتیریب، چوخلو سایدا فیلیسطین‌لی ایسه یارالانیب.

قئید ائدک کی، مارسین 15-ده ایسراییلین باش ناظیری بنیامین نتانیاهونون اوفی‌سیندن وئریلن آچیقلامادا رفح شهری‌نین گونئیینه مومکون حربی عملیات پلانی‌نین تصدیق ائدیلدیگی آچیقلانیب.

دیگر طرف‌دن، ایسراییل اوردوسونون 7 اوکتبردان اعتباراً غزه زولاغینا یاردیم‌لارین چاتماسینا مانع اولا‌راق آجلیغا سبب اولدوغو غزه زولاغینا قارشی حیاتا کئچیردیگی هوجوم‌لاردا جان ایتکیسی سون 24 ساعاتدا 93 نفر آرتا‌راق 31 مین 819 نفره چاتیب.