آمریکا تیک‌تاکی یاساقلاماغا حاضیرلانیر
نماینده‌لر مجلیسی، "میللی گوونلیکله باغلی پروبلئم اولوشدوردوغو" ادعاسییلا اؤلکه‌ده تیک‌تاکین قاداغان ائدیلمه‌سینین اؤنونو آچان قانون لایحه‌سینی قبول ائد‌رک سنایا گؤندردی
آمریکا بیرلشمیش دؤولتلری نماینده‌لر مجلیسی، "میللی گوونلیکله باغلی پروبلئم اولوشدوردوغو" ادعاسییلا اؤلکه‌ده تیک‌تاکین قاداغان ائدیلمه‌سینین اؤنونو آچان قانون لایحه‌سینی قبول ائد‌رک سنایا گؤندردی.
نماینده‌لر مجلیسینده ائدیله‌ن سس وئرمه‌ده، ۳۵۲ "اولار" اویونا قارشی، ۶۵ "یوخ" اویو آلان "آمریکالیلاری خاریجی دوشمنلر طرفیندن کنترل ائدیله‌ن اپلیکیشنلردن قوروما قانونو" باشلیقلی قانون قبول ائدیلدی.
قانون، تیک‌تاکین چینلی آنا اورتاغی بایت دانس شیرکتینین شیرکتی ساتماسینی، عکس حالدا تیک‌تاکین ایلگیلی اویقولاما مارکتلریندن ۵ آی مدتله و یا تامامیله قاداغان ائدیلمه‌سینی اؤن گؤرور.
جمهوریتچیلر و دموکراتلارین اورتاق اویلارییلا قبول ائدیله‌ن قانونا دستک وئره‌نلر، پکن مرکزلی بایت دانس شیرکتینین تیک‌تاک واسطه‌سی ایله الده ائتدیگی آمریکان وطنداشلارینا عاید بیلگیلرین چین رهبرلیگینه چاتدیریلدیغینی ساوونور.
قانونا قارشی چیخان کنگره عضولری، تیک‌تاکین بیلگی ییغیب چینه چاتدیردیغی ادعاسینین اثباتا محتاج اولدوغونو و اویقولامانین قاداغان ائدیلمه‌سینین "ایفاده اؤزگورلوگونو" قیسیدلاما معناسینا گله‌بیله‌جگینی ایر‌لی سۆرور.
تیک‌تاکین رهبرلیگی ایسه بو ادعالارین گئرچگی عکس ائتدیرمه‌دیگینی و آمریکا‌دا دیگر سوسیال مئدیا پلتفورملاری کیمی تامامیله آمریکان قانونلارینا گؤره چالیشدیقلارینی ادعا ائدیر.
قانونون نماینده‌لر مجلیسینده بؤیوک اکثریتله گئچمه‌سینین آردیندان، گؤزلر سنایا چئوریلمیش دورومدادیر.
باشقان جو بایدن، ماساسینا گلمه‌سی دوروموندا، اولوسال گوونلیک حساسیتی سببی ایله لایحه‌نی ایمضالایاجاغینی آچیقلامیشدی.
