مولداوی، روسیانین تحریک ائدیجی حرکتلریندن قورخور

مولداوی، (تانینمامیش) ترانس‌دینیسترده روسیا دؤولت باشقانلیغی سئچیملرینده اوی وئریلمه‌سی اوچون صاندیق قورولماسینا اعتراض ائتدی.

خاریجی ایشلر باخانلیغینین آچیقلاماسیندا، بو جور حرکتلرین مولداوی رهبرلیگینین ایجازسی اولمادان ائدیلمه‌سینین اولوسلارآراسی حقوق پوزونتوسو اولدوغو، اؤلکه‌نین اگمنلیک و تورپاق بوتونلوگونو تهدید ائتدیپی ایفاده ائدیلدی.

روسیانین مولداوی ائلچیسی اولگ واسنتسوو ایسه سئچیم صاندیقلارینین بؤلگه لیدئرلری ایله امکداشلیق حالیندا قورولدوغونو سؤیله‌دی. دیپلوماتین ادعاسینا گؤره ائلچیلیگین وظیفه‌سی "مولداویده‌کی تخمیناً ۲۵۰ مین روسیا وطنداشینین سئچمه حاقی داخیل حاقلارینی قوروماقدیر".

مولداوی خاریجی ایشلر باخانی میخای پوپشوی ایسه مولداوینین آوروپا بیرلیگی عضولوگونه یؤنلدیگی بیر دؤنمده روسیانین باسقیسیندان چکیندیکلرینی سؤیله‌دی.

پوپشوی، "روسلار دموکراتیک سۆره‌جدن بیزه قارشی ایستیفاده ائد‌رک دموکراتیک مولداوی حکومتینی دۆشورمک ایسته‌ییرلر" دئیه دانیشدی.

پوپشوی ترانس‌دینیسترده‌کی وضعیتین قارماشیق اولدوغونو قبول ائتدی و مولداوینین اقتصادی قالخینماسینا منفی تأثیر ائده‌بیله‌جگینی سؤیله‌دی.

مولداوی بیلگی و گوونلیک آژانسی باشقانی آلکساندر موستیاتسه، مولداوینین آوروپا بیرلیگینه ایشتیراکینا مانع تؤرتمک ایسته‌یه‌ن روسیانین قاقاووزیا و ترانس‌دینیسترده اجتماعی چاتیشمالاری قیزیشدیرابیله‌جگینی سؤیله‌میشدی.