آغ ائو روسیه ایله ایران آراسیندا حربی اورتاقلیغا قارشی حرکته کئچمک ایمکانلارینی خاطیرلاددی
کیربی «ایرانین روسیه ایله درینلشن حربی ایشبیرلیگی» تکجه اوکراینا دئییل، هم ده ایرانین بؤلگهدهکی قونشولارینا و اولوسلارآراسی توپلوما ضرر وئرجگینی ایرهلی سوروب
آمریکادا آغ ائوین میللی تهلوکهسیزلیک ایلتیشیم/ارتیباط اوزره موشاویری جان کیربی دئییب کی، ایرانین روسیهیه مومکون بالیستیک راکت تدارکینه اولوسلارآراسی توپلومون قارشیلیق وئرمهسی سورعتلی و سرت اولاجاق.
جان کیربی گوندهلیک مطبوعات بریفینگینده رویترز خبر آژانسینین ایرانین روسیهیه بالیستیک راکتلر وئرمهسی ایله باغلی ایدعالاری قییمتلندیریب.
آغ ائوین میللی تهلوکهسیزلیک ایلتیشیم/ارتیباط اوزره موشاویری کیربی «ایرانین روسیه ایله درینلشن حربی ایشبیرلیگی» تکجه اوکراینا دئییل، هم ده ایرانین بؤلگهدهکی قونشولارینا و اولوسلارآراسی توپلوما ضرر وئرجگینی ایرهلی سوروب.
کیربی، مسئلهنی یاخیندان ایزلهدیکلرینی و سؤزوگئدن ایدعانی تصدیق ائده بیلمدیکلرینی بیلدیریب، «امین اولا بیلرسینیز کی، ایران بالیستیک راکتلر وئرمهیه داوام ائدرسه، اولوسلارآراسی توپلومون قارشیلیق وئرمهسی سورعتلی و سرت اولاجاق» دئدی.
کیربی، لازیم اولسا، مسئلهنی بیرلشمیش میللتلر تشکیلاتینین تهلوکهسیزلیک شوراسینا چیخارا بیلجکلرینه دیقت چکیب، «بیز اوروپاداکی و باشقا یئرلردهکی موتفیقلریمیز و طرفداشلاریمیزلا علاوه جواب سئچنکلرینی کووردیناسییا ائدجییک»، دئدی.
کئچمیشده روسیه ایله ایران آراسیندا حربی اورتاقلیغا قارشی حرکته کئچمک ایمکانلارینی خاطیرلادان جان کیربی گلجکده ده عینی شئیی ائدهجکلرینی وورغولاییب.
آمریکا سؤزچوسو ایرانین روسیهیه دستیینه قارشی علاوه یاپتیریملار تطبیق ائدجکلرینی بیان ائدیب، «ایران روسیهیه بالیستیک راکتلر ساتارسا، بیز داها دا ایرلی گئتمیه حاضیریق»، دئدی.
21 فوریهده وئردیگی خبرده، ایران رسمیلری ایله موصاحیبهلره اساسلاناراق، رویترز بو اؤلکهنین روسیهیه تخمینن 400 بالیستیک راکت تداریک ائتدیگینی ایدعا ائتدی.
ایلگیلیلی خبرلر
آنتونی بلینکن چین-لی همکاری وانگ یی ایله گؤروشوب
امریکانین خاریجی ایشلر ناظیری آنتونی بلینکن چینه رسمی سفری چرچیوهسینده همکاری وانگ یی ایله گؤروشوب.