اولوسلار آراسی قیزیل خاچ کومیته‌سی غزه-ده‌کی اینسانی وضعیتله باغلی آچیقلاما وئریب

اولوسلار آراسی قیزیل خاچ کومیته‌سی (ICRC) غزه-ده یاشایان 2 میلیون‌دان چوخ اینسانین اساس احتیاج‌لار، سو و الکتریک انرژی‌سیندن محروم اولدوغونو بیلدیریب.

اولوسلار آراسی قیزیل خاچ کومیته‌سی-نین "ایکس" سوسیال مئدیا پلاتفورموندا ائدیلن پای‌لاشیمدا ایسراییلین شدتلی هوجوم‌لاری‌نین داوام ائتدیگی غزه-ده سون وضعیتله باغلی معلومات وئریلیب.

پای‌لاشیمدا "غزه-ده یوز مین‌لرله اینسانین یاتماغا یئری یوخ‌دور. غزه ده 2 میلیون‌دان چوخ اینسان اساس احتیاج‌لاردان، سو و الکتریک انرژی‌سیندن محروم‌دور. عاجیل یاردیم ماشین‌لاری یارا‌لی‌لارا چاتا بیلمیر. سیویل اینسان‌لارین سلاحلی توققوشما‌لارین تأثیریندن قورونماسی واجیب‌دیر" دئییلیب.

قئید ائدک کی، ایسراییل اوکتبرین 8-ده محاصیرده اولان غزه-یه سو، الکتریک، غذا و دیگر اساس خیدمت‌لری کسمک قرارینا گلیب.

دونیا ساغلیق تشکیلاتی‌نین باش مودیری تدروس آدهانوم گبریسوس دا غزه-یه طبی خیدمت گؤسترمک اوچون اینسانی دهلیزه احتیاج دویدوق‌لارینی بیلدیریب.

تدروس آدهانوم گبریسوس فرانسانین لیون شهرینده وئردیگی آچیقلامادا بو دهلیزین غزه -ده‌کی سیویل وطنداش‌لارین قورونماسی و دستکلنمه‌سی باخیمیندان اهمیت‌لی بیر فونکسیونو اولاجاغینا دا ایشاره ائده‌رک، "اونلارین قیدا، طبی خیدمت و لوازیمات‌لارا احتیاجی وار" دئییب.

دیگر طرف‌دن، بیرلشمیش میللت‌لر تشکیلاتی (بمت) محاصیره آلتینداکی غزه زولاغیندا دیدرگین دوشن فیلیسطین‌لیلرین سایی‌نین سون 24 ساعاتدا 30 فایز آرتا‌راق 338 مینی کئچدیگینی آچیقلاییب.

بمت باش کاتیبی‌نین سؤزچوسو استفان دوجاریک بیلدیریب کی، غزه زولاغیندا فیلیسطین قاچقین‌لارینا یاردیم آژانسینا  (UNRWA) عایید 92 مکتبه تخمینن 218 مین کؤچکون فیلیسطین‌لی یئرلشدیریلیب.

استفان دوجاریک بیلدیریب کی، ایسراییل اوردوسونون هاوا هوجوم‌لاری نتیجه‌سینده غزه-ده 2500 یاشاییش منطقه‌سی یارارسیز حالا دوشوب و ان آزی 88 تحصیل مرکزی وورولوب.

خاطیرلاداق کی، "حماس"ین حربی قانادی عزالدین قسام گردان لاری اوکتبرین 7-سی گئجه‌سی ایسراییله قارشی "القصی طوفانی" آدلی هرطرف‌لی هوجوما کئچیب. غزه-دن ایسراییله دوغرو مین‌لرله راکت آتیلیب، سلاحلی قروپ‌لار بؤلگه‌ده‌کی یاشاییش منطقه‌لرینه داخیل اولوب. ایسراییل اوردوسو دا دؤیوش اوچاق لاری ایله غزه زولاغینا قارشی "دمیر قیلینج‌لار" عملیاتینا باشلاییب.

آرتان گرگین‌لیکده هر ایکی طرف‌دن یوزلرله ایتکی، مین‌لرله یارا‌لی وار.