۵۴۸ عصیانچی اؤلدورولدو

اوگاندا اوردوسو طرفین‌دن کونگو دموکراتیک جمهوریتینین قوزئیینده ایجرا ائدیله‌ن عملیاتلاردا، عصیانچی دموکراتیک اتفاق گوجلری عضوو ۵۴۸ نفرین اؤلدورولدوگو آچیقلاندی.
کونگو دموکراتیک جمهوریتینده‌کی عملیات سؤزچوسو آلبای بلال کاتامبا، مطبوعاتا وئردیگی آچیقلامادا، دموکراتیک اتفاق گوجلرینه قارشی عملیاتلارین سوردوگونو سؤیله‌دی.
کاتامبا، بؤلگه‌ده‌کی عملیاتلاردا، ۵۴۸ دموکراتیک اتفاق گوجلری عضوونون اؤلدورولدوگونو، ۵۰سینین توتولدوغونو و ۳۱ینین تسلیم اولدوغونو آچیقلادی.
عملیاتلارین اوگاندا اوردوسو طرفین‌دن ایجرا ائدیلدیگینی ایفاده ائد‌ن کاتامبا، بو مدت‌ده حیاتینی ایتیره‌ن عسگر اولوب اولمادیغینا باغلی بیلگی وئرمه‌دی.
شدت حادثه‌لرینین آرتماقدا اولدوغو کونگو دموکراتیک جمهوریتینین قوزئی کیوو و ایتوری ایالتلرینده، گوونلیگی کنترل آلتینا آلماق مقصدی ایله ۷ می ۲۰۲۱ده عسگری قوشادما اعلان ائدیلمیشدی. قوشادما چرچیوه‌سینده، بؤلگه‌ده‌کی مولکی مسئوللار وظیفه‌دن آلیناراق یئرلرینه عسگری مسئوللار گتیریلمیشدی.
اوگاندا و کونگو دموکراتیک جمهوریتینده ۱۹۹۰لارین سونلارین‌دان اعتباراً فعالیت گؤسترمه‌یه باشلایان دموکراتیک اتفاق گوجلرینین سالدیریلارین‌دا ۲۰۱۴دن بو یانا مینلرجه وطنداشین اؤلدوگو، یوز مینلرجه اینسانین یئریندن ائدیلدیگی ایفاده ائدیلیر.