فرانسادا امکلیلیک اصلاحاتینا قارشی میللی اعتراض نوماییشی داوام ائدیر

پاریس-ده اینوالیدس میدانینداکی لاروتونده رستورانی یاخینلیغیندا امکلیلیک اصلاحاتی علیهینه اعتراض نوماییشچی‌لری و پولیس آراسیندا قارشیدورما اولوب. امانوئل ماکرون 2017-جی ایلده ایلک دفعه پرزیدنت سئچیلدیک‌دن سونرا غلبه‌سینی محض "لا روتونده" رستورانیندا قئید ائتمیشدی. بئله بیر فیکیر دولاشیر کی، بو رستوران ائله امانوئل ماکرونا مخصوص‌دور. بونا گؤره ده نوماییشچی‌لر رستورانین ویترینینی سیندیرماغا جهد ائدیب‌لر. پولیس رستورانین اطرافینی محاصره‌یه آلا‌راق قورویوب. نوماییشچی‌لری داغیتماق اوچون سو شیرناغیندان دا ایستیفاده ائدیلیب.

پولیس پاریس-ده سحر ساعات‌لاریندا 2700 یوخلاما آپاردیغینی و 14 نفرین دیندیریلدیگینی بیلدیریب. همچنین، پولیس موقتی ساخلانیلان‌لارین دا اولدوغونو سؤیله‌ییب.

پاریس-2024 الیمپیک اویون‌لاری تشکیلات کومیته‌سی‌نین بیناسینا نوماییشچی‌لرین سوخولدوغو بیلدیریلیر. نوماییشچی‌لر اعتراض آکسیا‌لاری‌نین دایاندیرمایا‌جاق‌لارینی بیان ائدیب‌لر. آرتیق 6 آیدیر باشلایان اعتراض نوماییش‌لری‌نین داوام ائدجگی قئید اولونوب.

نوماییشه بیر چوخ سیاسی پارتیا‌لارین رهبرلری و عضو‌لری ده قاتیلیب. پاریس بولگه سینده تحصیل ایشچی‌لری اعتصاب ائدیر. اورتا و ابتدایی مکتب‌لرده معلم‌لر درسه گئتمه‌ییب. سندیکالار امکلیلیک اصلاحاتینا قارشی موباریزه‌لرینی داوام ائتدیره‌جک‌لرینی بیان ائدیب‌لر.