امانوئل ماکرون و ولودیمیر زلنسکی‌نین پاریس-ده گؤروشو اولوب

فرانسا پرزیدنتی امانوئل ماکرون و اوکراینا پرزیدنتی ولودیمیر زلنسکی فرانسانین پایتاختی پاریس-ده گؤروشوب.

ماکرون و زلنسکی آراسیندا تخمینن 3 ساعات داوام ائدن گؤروشله باغلی الیزه سارایین‌دان وئریلن بیرگه بیاناتدا ایکی لیدرین اوکراینا-روسیا محاربه‌سینی پیسله‌دیک‌لری بیلدیریلیب.

روسیانین اوکراینا اراضی‌سیندن حربی قوه‌لرینی درحال و قئید-شرط‌سیز چکمه‌لی اولدوغو وورغولانا‌راق، فرانسا و اوکراینانین دا روسیانی زاپوروژیه آتوم الکتریک سانترالیندان چکیلمه‌یه چاغیردیغی قئید اولونوب.

بیاناتدا فرانسانین اوکراینانین موستقیل‌لیگی، اگمنلیگینی و اراضی بوتؤو‌لوگونه صادق اولدوغو وورغولانیب.

پاریس رهبرلیگی‌نین لازیم اولدوغو مدتجه اوکراینایا سیاسی، مالیه، اینسانی و حربی دستکینی داوام ائتدیرجگینه دقت چکیلن بیاناتدا فرانسا پرزیدنتی امانوئل ماکرونون اوکراینا اوردوسونون بیر نئچه تابورونا تعلیم کئچمه‌یه، اونلارا مووافیق سلاح و زره لی تجهیزاتین وئرمه‌یه حاضیر اولدوغونو دئدیگی بیلدیریلیب.

بیاناتدا همچنین قئید اولونوب کی، پاریس رهبرلیگی سعی‌لرینی “اوکراینانین هاوا هوجومون‌دان ساوونما ایمکان‌لارینا دستک” اوزرینده جمعله‌ییب.

فرانسانین بون‌دان اول ده اوکراینایا 2 DNA لابراتوار گؤندردیگی و اوکراینانین باریش پلانینی دستکلدیگی بیلدیریلیب.

اوکراینا و فرانسانین روسیایا قارشی یئنی تحریم لر چاغیریشینا توخونولان بیاناتدا فرانسانین اوکراینانین قارا دنیز تاخیل تشببوسونو داوام ائتدیرمک سعی‌لری‌نین اهمیتینی وورغولادیغی بیلدیریلیب.

بیاناتدا اوکراینانین و خالقی‌نین گله‌جگی‌نین آوروپا عائله‌سینه عایید اولدوغو، فرانسانین ناتو-اوکراینا کمیسیونونا دستک وئردیگی بیلدیریلیب.

اوکراینا پرزیدنتی ولودیمیر زلنسکی داها سونرا لندونا سفر ائدیب.

خاطیرلاداق کی، اوکراینا پرزیدنتی می‌ین 13-ده رومایا سفر ائدیب، بورادا ایتالیا پرزیدنتی و باش ناظیری ایله گؤروشوب، همچنین روما پاپاسی‌نین قبولوندا اولوب.

داها سونرا آلمانیایا سفر ائدن زلنسکی پرزیدنت فرانک والتر اشتاین مایر  و صدر اعظم اولاف شولتز ایله دانیشیق‌لار آپاریب.