کنگو جمهوریتینده داشقین نتیجه‌سینده اؤلن‌لرین سایی 394 نفره چاتیب

کنگو دموکراتیک جمهوریتی‌نین دوغوسونداکی گونئی کیوو ایالتینده لئیسان یاغیش‌لارین سبب اولدوغو داشقین‌لاردا حیاتینی ایتیرن‌لرین سایی 394-ا یوکسلیب.

میللی مطبوعاتدا یئر آلان خبرلره گؤره، گونئی کیوو ایالتی‌نین بوشوشو و نیاموکوبی  کندلرینده ایکی گون اول باش وئرن داشقین‌دان سونرا داها 218 نفرین جسدی تاپیلیب.

داشقین نتیجه‌سینده 394 نفر حیاتینی ایتیریب. چوخ سایدا اینسانین ایتکین دوشدوگو فلاکتده آختاریش- قورتارما ایشلری داوام ائدیر.

بؤلگه‌یه یاغان گوجلو یاغیش چیبیرا چایی‌نین داشماسینا سبب اولوب.

تروپیک ایقلیم زوناسیندا یئرلشن کنگو دموکراتیک جمهوریتی یاغیش‌لی مؤوسومده تئز-تئز طبیعی فلاکت‌لرله اوزلشیر.