آوروپا بیرلیگیندن ایرانا: اعداملاری دوردورون

آوروپا بیرلیگی، ایرانین آوروپا بیرلیگی ائلچیسی حسین دهقانییه، اؤلکه‌سین‌ده‌ سون دؤنمده‌کی اعتراضلارلا باغلی اعداملاردان سونرا وئریله‌ن اؤلوم حؤکملرینین دوردورولماسی چاغریسی ائتدی.

آوروپا بیرلیگی خاریجی ایلیشکی‌لر سرویسی باش کاتیبی استفانو سانینو، ایرانلی ائلچینی چاغیریاراق آوروپا بیرلیگینین خاریجی ایلیشکی‌لر و گوونلیک سیاستی یوکسک نماینده‌سی جوزپ بورل آدینا ۷ ژانویه‌ده محمد مهدی کرمی ایله سید محمد حسینی‌نین اؤلکه‌ده‌کی اعتراضلارلا باغلانتیلی اولاراق اعدام ائدیلمه‌سی حاقیندا آوروپا بیرلیگینین دهشته گلدیگینی بیلدیردی.

بورلین دفتریندن وئریله‌ن آچیقلامایا گؤره، ایران ائلچیسی دهقانی ایله گؤروشه‌ن سانینو، اعتراضچیلارا اؤلوم جزاسی وئریلمه‌سینین دوردورولماسی اوچون آوروپا بیرلیگینین چاغریسینی تکرارلادی.

سانینو، آوروپا بیرلیگینین هر حالدا اؤلوم حؤکمونون علیه‌ینه اولدوغونو خاطیرلاداراق، ایرانین حرکتلرینه قارشی آوروپا بیرلیگینین و عضو اؤلکه‌لرین بیرلیک ایچینده اولدوقلارینی بیلدیردی.

ایرانین یاشکندی تهران‌دا ۱۳ سپتامبردا "اخلاق پلیسی" اولاراق بیلینن "گشت ارشاد" طرفین‌دن ساخلانیلدیقدان سونرا وضعیتی پیسله‌شرک خسته‌خانایا آپاریلان ۲۲ یاشلی گنج بیر قادین ۱۶ سپتامبردا یاشامینی ایتیردی. بوندان سونرا ۱۷ سپتامبردا باشلایان گؤستریلر بوتون اؤلکه‌یه یاییلاراق حکومت قارشیدی اعتراضلارا چئوریلدی.

اعتراضلاردا یوزلرجه گؤستریچی حیاتینی ایتیردی، اون مین‌دن چوخ گؤستریچی ایسه گؤزآلتینا آلیندی.

گؤستریلردن سونرا اونلارجا اینسان اعداملا یارغیلاندی. حاقیندا اعدام جزاسینا وئریلن محسن شیکاری ۸ دسامبردا، مجیدرضا رهنورد ۱۲ دسامبردا، محمد مهدی کر‌می و سید محمد حسینی‌ ایسه ۷ ژانویه‌ده اعدام ائدیلدی.