لولا دا سیلوانین برزیلیا‌داکی پرزیدنت سئچکی‌لرینده غلبه‌سی رسمیلشیب

برزیلیانین کئچمیش پرزیدنتی لوئیس ایناسیو لولا داسیلوا اؤلکه‌یه 2023-2027-جی ایللر عرضینده اوچونجو دفعه رهبرلیک ائده‌جک.

عالی سئچکی محکمه‌سی اونون سئچکی‌لرین ایکینجی توروندا 50،9 % سس توپلادیغینی آچیقلاییب.

سس‌لرین 100 فایزی‌نین حسابلانماسی ایله لولا داسیلوانین نتیجه‌سی 50،9 فایز اولوب. اونون رقیبی، حاضیرکی پرزیدنت ژایر بولسونارونو سسوئرمه‌یه گلن‌لرین 49،1%-ی دستکله‌ییب.

موطلق رقم‌لرده لولانین بولسونارو اوزرینده اوستون‌لوگو، دئمک اولار کی، 2،14 میلیون سس اولوب. عمومی‌لیکده، اوکتبرین 30-دا کئچیریلن سسوئرمه‌ده سس حقوقو اولان 156،4 میلیون وطنداش‌دان 118،55 میلیون سئچیجی ایشتیراک ائدیب.

قئید ائدک کی، 77 یاش‌لی لوئیس ایناسیو لولا داسیلوا (و یا قیساجا لولا) 2003-جو ایلدن 2010-جو ایلدک برزیلیانین پرزیدنتی اولوب. او، سوسیالیست فهله پارتیاسی‌نین هم تاسیسچی‌سی و فخری صدری‌دیر. بئش دفعه پرزیدنت سئچکی‌لرینده ایشتیراک ائدیب. ایلک اوچ دفعه (1989، 1994 و 1998-جی ایللرده) مغلوب اولوب. او، 2002-جی ایلده سئچیلیب، 2006-جی ایلده ایسه یئنی‌دن سئچیلیب.

2010-جو ایلده "تایم" ژورنا‌لی لولانی "دونیانین ان تأثیرلی اینسانی" آدلاندیریب.

لولا 2017-جی ایلده کورروپسیا و چیرک‌لی پول‌لارین یویولماسی ایشی اوزره 9،5 ایل مدتینه آزادلیق‌دان محروم ائدیلیب. او، 2019-جو ایلین نوامبریندا آزاد ائدیلیب. 2021-جی ایلین مارسیندا برزیلیانین فدرال عالی محکمه‌سی اونا قارشی بوتون اتهام‌لاری لغو ائدیب.