موساددان آمریکایا ایرانلا باغلی استخبارات
"موساد باشقانی ایران دونیانی آلداتماغا داوام ائدرکن، اسرائیلین بوش دورمایاجاغینی وورغولادی"
اسرائیل، آمریکایا گئد‌ن خاریجی استخبارات سرویسی موساد باشقانی دیوید بارنیانین، مسئوللارا، ایرانین نۆوه فعالیتلری ایله باغلی "حساس استخبارات ماتئریاللاری سوندوغونو" بیلدیردی.
اسرائیل باشباخانلیغی مطبوعات دفتریندن وئریله‌ن آچیقلامادا، موساد باشقانی بارنیانین، باشباخان یائیر لاپیدی، دۆنن باشا ووردوغو آمریکاداکی دیپلوماتیک و گۆونلیک قونولو توپلانتیلاری حاقیندا بیلگیلندیردیگی بیلدیریلدی.
آچیقلامادا، بارنیانین، آمریکا گؤروشمه‌لری چرچیوه‌سینده، مرکزی استخبارات تشکیلاتی (سی‌آی‌ای) و فدرال سوروشدورما بوروسو (اف‌بی‌آی) باشقانلاری، اولوسال گۆونلیک موشاویری، ساوونما باخانی، باش قرارگاه رئیسی و دیش ایشلری باخانلیغی مقاملاری ایله بیر آرایا گله‌رک، بیر سیرا یوکسک دیپلوماتیک و گۆونلیک قونولو توپلانتیلار ائتدیگی بیلدیریلدی.
بارنیانین، موذاکیره‌لر چرچیوه‌سینده آمریکالی مقاملارا ایرانین نۆوه فعالیتلری ایله باغلی "حساس استخبارات ماتئریاللاری" سوندوغو ایفاده ائدیله‌ن آچیقلامادا، "موساد باشقانی ایران دونیانی آلداتماغا داوام ائدرکن، اسرائیلین بوش دورمایاجاغینی وورغولادی" ایفاده‌لرینه یئر وئریلدی.
بارنیانین آمریکالی مسلکداشلاریندان، "اسرائیلین گۆونلیگینه باغلیلیقلارینی سۆردوردوکلرینی" ائشیتدیگی بیلدیریلن آچیقلامادا،
"دانیشیقلاردا آمریکالیلار، ایرانین نۆوه سلاحی الده ائتمه‌سینه ایجازه وئرمه‌یه‌جکلرینی و اسرائیل دؤولتینین گۆونلیگینی ایلگیلندیرن اورتادوغوداکی بؤلگه‌سل مسئله‌لرده تام بیر امکداشلیق ایچینده حرکت ائتمه‌یه داوام ائد‌جکلرینی وورغولادیلار" دئییلدی.
