شولتس: پوتین ساواشی قازانابیلمه‌یه‌جک
"روسیانین دیکته ائتدیگی بیر باریش اولمایاجاق. اوکراینا و بیز بونو قبول ائتمه‌یه‌جییک. پوتین ساواشی قازانابیلمه‌یه‌جک. اوکراینا آیاقدا قالاجاق"
آلمانیا باشباخانی اولاف شولتس، روسیا پرزیدنتی ولادیمیر پوتینین اوکراینا ساواشینی قازانابیلمه‌یه‌جگینی، اوکراینانین آیاقدا قالاجاغینی سؤیله‌دی.
اولاف شولتس، آوروپادا ایکینجی دونیا ساواشینین بیتمه‌سینین ۷۷.جی ایل‌دؤنومو ایله باغلی تلویزیوندان خالقا سسلنیشینده، روسیانین ۲۴ فوریه‌ده باشلادیغی ساواشین نه واخت و نئجه بیته‌جگینی دئیه بیلمه‌یه‌جگینی بیلدیررک:
"آنجاق بیر شئی آیدیندیر: روسیانین دیکته ائتدیگی بیر باریش اولمایاجاق. اوکراینا و بیز بونو قبول ائتمه‌یه‌جییک. پوتین ساواشی قازانابیلمه‌یه‌جک. اوکراینا آیاقدا قالاجاق. اؤزگورلوک و گوونلیک غالیب گله‌جک" ایفاده‌لرینی ایشلتدی.
روسیا پرزیدنتی ولادیمیر پوتینین اوکراینانی بویوندوروق آلتینا آلماق ایسته‌دیگینی ادعا ائد‌ن شولتس، پوتینین اوکراینالیلارین "مدنیتلرینی و کیملیکلرینی یوخ ائتمک" ایسته‌دیگینی سؤیله‌دی.
ایکینجی دونیا ساواشینین ان اؤنملی نتیجه‌سینین "بیر داها ساواش و سوی‌قیریم یاشاماماق" اولدوغونو ایفاده ائد‌ن شولتس، آوروپادا یئنی‌دن ساواش اولدوغونو و اؤلکه‌سینین شدتی سونلاندیرماق اوچون موباریزه آپاردیغینی وورغولادی.
روسیایا قارشی گؤرولمه‌میش تحریملرین تطبیق ائدیلدیگینی قید ائد‌ن اولاف شولتس، اؤلکه‌سینین اوکراینایا هر جور دستیگی داوام ائتدیرجگینی بیلدیردی.
آلمان خالقینین اوکراینالیلارا قاپیلارینی آچدیغینا دقت چکه‌ن شولتس، کؤمک ائد‌ن هر کسه تشکور ائتدی.
شولتس، سالدیرییا معروض قالان اوکراینا ایله دایانیشما گؤسترمه‌نین عینی زاماندا آلمانیا و ناتونون گوونلیگی اوچون تاریخی مسئولیت‌د اولدوغونو وورغولادی.
ایلگیلی‌لی خبرلر
آنتونی بلینکن چین-لی همکاری وانگ یی ایله گؤروشوب
امریکانین خاریجی ایشلر ناظیری آنتونی بلینکن چینه رسمی سفری چرچیوه‌سینده همکاری وانگ یی ایله گؤروشوب.
