دونیا ساغلیق تشکیلاتیندان روسیا-یا چاغیریش
دونیا ساغلیق تشکیلاتینین باش مودیری تدروس آدهانوم گبریسوس اوکراینا خالقینین هوجوملارا قارشی گؤستردیگی مقاومتی یوکسک قیمتلندیریب.
"روسیانی بو ساواشی (اوکراینایا قارشی) دایاندیرماغا چاغیرماغا داوام ائدجییک".
بونو اوکراینایا سفری چرچیوهسینده پایتاخت کیئوده اوکراینانین ساغلیق ناظیری ویکتور لیاشکو ایله بیرگه مطبوعات کنفرانسیندا دانیشان دونیا ساغلیق تشکیلاتینین باش مودیری تدروس آدهانوم گبریسوس دئییب.
تدروس آدهانوم گبریسوس ساواشین ایچینده بؤیودوگونه ایشاره ائدهرک، "من ساواشین داغیدیجی تأثیرلرینی شخصاً بیلیرم. اونا گؤره ده روسیانین اوکراینایا تجاووزو منی چوخ کدرلندیردی" دئیه قئید ائدیب.
اوکراینا خالقینین هوجوملارا قارشی گؤستردیگی مقاومتی یوکسک قیمتلندیردیگینی وورغولایان تدروس آدهانوم گبریسوس بیلدیریب کی، ایتکیلری اولان خالق هله ده تسلیم اولماییب. هر شئیه رغمن داوام ائدیر، ساواشین داغیتدیغی ساغلیق بینالارینی تعمیر ائدیرلر. بو اینسانلار ساغلیق خیدمتلرینه، اینسان حیاتینین قورونماسینا اوستونلوک وئریرلر.
دونیا ساغلیق تشکیلاتینین باش مودیری اوکراینادا ساواش باشلایاندان بری فوریهنین 24-دن بری ساغلیق اوجاقلارینا 200 هوجوم ائدیلدیگی بارهده معلوماتی چاتدیریب:
"بو هوجوملار دایاندیریلمالی، ساغلیق خیدمتلری هدف اولماقدان چیخمالیدیر. اوکرایناداکی اکیپیمیز محاربهدن اوولکیندن ده گوجلو ساغلیق سیستمی قورماق اوچون چوخ چالیشیر. بو ایشلر داوام ائدهجک".
تدروس آدهانوم گبریسوس دونیا ساغلیق تشکیلاتی-نین محاربهنین منفی تأثیرلرینی آزالتماق اوچون طبی یاردیمینی داوام ائتدیرجگینی ده وورغولاییب:
"اوکراینانین ان چوخ احتیاج دویدوغو و دونیا ساغلیق تشکیلاتی-نین تأسف کی، گؤندره بیلمهدیگی یگانه درمان باریش دیر. بیز روسیانی بو محاربنی دایاندیرماغا چاغیرماغا داوام ائدجییک".
ایلگیلیلی خبرلر
فیلیسطینه دستک نوماییشلری داوام ائدیر
دونیانین بیر چوخ یئرینده مینلرله اینسان ایسرائیلین غزه زولاغینا هوجوملارینا اعتیراض ائدیب