امریکا سوریه-ده داعش-ا قارشی حیاتا کئچیریلن عملیات حاقیندا بیانات وئریب
ترور تشکیلاتی داعش لیدئری ابوابراهیم الهاشمی القریشی‌نین کیم‌لیگی بارماق و دی ان آی تحلیلی نتیجه‌سینده معین ائدیلیب.
امریکا ساوونما ناظیرلیگی‌نین سؤزچوسو جان کربی سوریه-نین قوزیی-باتی سیندا حیاتا کئچیردیک‌لری هوجومدا اؤلو اولا‌راق اله کئچیریلن ترور تشکیلاتی داعش لیدئری ابوابراهیم الهاشمی القریشی‌نین کیم‌لیگینی بارماق و دی ان آی (DNA ) تحلیلی نتیجه‌سینده معین ائتدیک‌لرینی سؤیله‌ییب.
گونده‌لیک مطبوعات کنفرانسیندا هوجومو شرح ائدن کربی بیلدیریب کی، القریشی هوجومون اولینده حیات یولداشی و ایکی اوشاغی بینانین اوچونجو مرتبه‌سینده یانیندا اولارکن اؤزونو پارتلاییجی ایله اؤلدوروب.
بینانین ایکینجی مرتبه‌سینده القریشی‌نین کؤمکچی‌سی و حیات یولداشی‌نین امریکا قوه‌لرینه آتش آچدیغینی قئید ائدن کربی قریشی‌نین کؤمکچی‌سی و کؤمکچی‌سی‌نین حیات یولداشی ایله یاناشی، بیر اوشاغین دا اؤلدورولدوگونو بیلدیریب.
هله‌لیک 3-و اوشاق اولماقلا 4 سیویل وطنداشین اؤلدوگونو معین ائتدیک‌لرینی آچیقلایان کربی بو رقمین دییشه بیله جگینی ده دیله گتیریب.
کربی همچنین اوشاق‌لارین دا اولدوغو 10 سیویل شخصین ایسه بینانی ترک ائتدیگینی بیلدیریب.
بینا‌دان چیخان سیویل شخص‌لرین امریکا طرفیندن گؤتورولمه‌دیگینی ایفاده ائدن کربی اونلارین تالعی ایله باغلی آچیقلاما وئرمه‌ییب.
القریشی‌نین شخصیتینی نئجه آشکارلادیق‌لاری ایله باغلی سوا‌لی جاوابلان‌دیران کربی دئییب:
"بارماق ایزلری و DNA تستی ایله معین ائتدیک. ساحه‌ده بارماق ایزلرینی، بیر مدت سونرا ایسه DNA آنالیزینی تحلیل ائده بیلدیک" دئییب.
بو عملیاتین آیلار اولدن پلانلاشدیریلدیغینی ایفاده ائدن کربی بئله بیر عملیاتی حیاتا کئچیرمک اوچون گوجلو کشفیاتین واجیب اولدوغونو قئید ائدیب.
عملیاتین سون‌لارینا دوغرو بیر قروپون ائوه یاخینلاشدیغینی و امریکا قوه‌لری‌نین "دوشمن" اولا‌راق تصویر ائتدیگی قروپا آتش ائدیلدیگینی وورغولایان کربی اورا‌داکی قارشیدورمادا 2 نفرین اؤلدورولدوگونو بیلدیریب.
دیگر طرف‌دن، امریکا مرکزی قوه‌لری‌نین (سنتکام) قوموتانی کومان‌دانی کنت مک کنزی سوریه-نین قوزیی-باتی سیندا ترور تشکیلاتی داعش قروپلاشماسی‌نین لیدئری القریشی‌نین اؤلدورولدوگو عملیاتلا باغلی "میسیونون مقصدی اونو اله کئچیرمک ایدی" دئییب.
او، اورتا دوغو اینستیتوتونون "MEI-CENTCOM ایللیک کنفرانسی"ندا اؤتن گئجه امریکا اوزه ل قوه لرینین ادلیب-ده داعش-ین لیدئری القریشی‌یه قارشی حیاتا کئچیردیگی عملیاتلا باغلی معلومات وئریب.
عملیاتین اوزون منزیل‌لی هلیکوپتر باسقینی ایله حیاتا کئچیریلدیگینی بیلدیرن مک کنزی "مقصد داعش لیدئرینی اله کئچیرمک ایدی، عملیاتین مقصدی بو ایدی، لاکین مهارتله پلان‌لاش‌دیریلان و حیاتا کئچیریلن عملیات ابوبکر البغدادی‌نین خلفی‌نین اؤلومو ایله نتیجه‌لندی" دئییب.
او، القریشی‌نین البغدای قدر تانینمادیغینی قئید ائده‌رک دئییب کی، سیزی امین ائده بیلرم کی، او، امریکا و طرفداش‌لاریمیزا هوجوم ائتمکده ان آز اونون قدر پیس و قرارلی ایدی" ایفاده‌سینی ایشله‌دیب.
سنتکام قوموتانی قئید ائدیب کی، عملیات زامانی قریشی بینانین 3-جو مرتبه‌سینده باش وئرن گوجلو پارتلاییش نتیجه‌سینده اؤلوب.
"القریشی جاواب وئرمه‌دی. بیز اونو تسلیم اولماغا چاغیرساق و ساغ قالماغین یولونو تکلیف ائتسک ده، او، دؤیوشمه‌دن اؤزونو و یاخین عائله‌سینی اؤلدوردو" دئیه مک کنزی وورغولاییب.
امریکانین سنتکام-ا باغلی خصوصی قوه‌لری‌نین اؤتن گئجه ادلیب-ده داعش لیدئری القریشی‌یه قارشی کئچیردیگی عملیاتین آردیندان داغینتی‌لار آلتیندا چالیشان سیویل ساوونما قروپ‌لاری، باسقیندا 6-سی اوشاق، 4-و قادین اولماقلا 13 نفرین اؤلدوگونو بیلدیریب.
یئرلی تهلوکه‌سیزلیک قوه‌لری امریکا عسگرلری‌نین عملیاتدا ائودکی شخص‌لردن بیرینی جان‌لی اولا‌راق اؤزلری ایله آپاردیق‌لارینی بیلدیریب‌لر.
