گوایدو حکومتله گؤروشدوک‌لرینی آچیقلادی

ونزوئلادا اؤزونو موقتی دولت باشقانی اعلان ائدن موخالیف میللی مجلیس باشقانی خوان گوایدو، سئچیلمیش پرزیدنتی نیکولا مادورو حکومتی ایله نوروئژده گؤروشدوک‌لرینی ایفاده ائتدی.

آیلاردیر تاریخی‌نین ان جیدی سیاسی بحرانلاریندان‌ بیرینی یاشایان ونزوئلادا حکومتی دئویرمک اوچون آمریکا باشدا اولماقلا بیر چوخ لاتین آمریکا و غرب اؤلکه‌سین‌دن دستک آلان گوایدو، دفعه‌لرله رد ائتدیگی موذاکیره ماساسینا اوتوردوغونو یازی‌لی آچیقلاما ایله ائشیتدیردی.

کئچن ایل ائدیلن دولت باشقان‌لیغی سئچیمینی یوزه 68له قازانان مادورویا قارشی بیر چوخ دفعه کودتا چاغیریشینا و بیر ده اوغورسوز نیظامی قالخیشمایا ایمضا آتان گوایدو، آچیقلاماسیندا دانیشیق‌لارین یئنه بو هدف ایستیقامتینده ائدیلدیگینی ادعا ائتدی.

گوایدو، موذاکیره هئیتینده موخالیف میللی مجلیس باشقانی ایکینجی باشقان کؤمکچی‌سی ایستالین گونزالس، اسکی میللت وکیل‌لری فرناندو مارتینز موتتولا و گراردو بلید ایله تکنیکی مصلحت وظیفه‌سینده ویسنت دیازین اولدوغونو قئید ائتدی.

دانیشیق‌لارا دایر 2 هفته اوّل مطبوعاتا عکس اولونان و گوایدونون یالانلادیغی خبرلرده ده بو آدلارین موذاکیره هئیتینده اولدوغو ایفاده ائدیلمیشدی.

خوان گوایدو، "ونزوئلا خالقینا، سیلاح‌لی گوجلره و بین الخالق توپلوما" ایستیقامت‌لی ائتدیگی آچیقلاماده آیریجا "رژیم" اولا‌راق آدلاندیردیغی حکومت طرفین‌دن "قاندیریلماماق و بؤلونممک" اوچون بون‌دان سونرا تئز-تئز موذاکیره‌لرله باغلی بیانات وئرجگینی وورغولادی.

گوایدو، موذاکیره‌لری ایلک باش‌لاردا یالانلامیش، داها سونرا "نوروژ حکومتی‌نین یاخشی نیت‌لی تلاشلارینی قارشی‌لیق‌سیز بوراخماماق اوچون" بیر هئیتین حکومتله گؤروشدوگونو قبول ائتمیشدی.

بو آرادا نوروئژ طرفی ده گوایدونون یازی‌لی آچیقلاماسین‌دان اؤنجه رسمی آچیقلاماسیله باشکند اوسلودا مادورو حکومتی و موخالیف‌لرین ایکینجی گؤروشمه اوچون بیر آرایا گلجگینی بیلدیریب.

دیگر طرف‌دن اؤلکه مطبوعاتین‌داکی خبرلره گؤره گوایدو، Barquisimeto شهرینده طرفدارلاری ایله بیر آرایا گلدی و خالقی بو گون اوچون کوچه‌یه چیخماغا چاغیردی.