اعداملارین ساییسی آزالدی

دونیاداکی اعداملار اوچده بیر آزالدی.

اولوسلارآراسی عفو هؤرگوتونون ائتدیگی چالیشمایا گؤره، دونیا سویه‌سینده اعداملارین ساییسی گئچنن ایل اوچده بیر سویه‌سین‌ده آزالاراق سون ۱۰ ایلدکی ان آشاغی سویه‌یه چاتدی.

راپورا گؤره ۲۰۱۷ده دونیا اوزره ۹۹۳ اعدام جزاسی تطبیق اولوندو و بو سایی ۲۰۱۸ده ۶۹۰ اولاراق گرچکلشدی.

چین‌ده باش وئره‌ن اعداملارا دایر رسمی معلوماتلارا چاتیلمادیغی اوچون راپوردا چین استثنا توتولور.

دیگر طرف‌دن، ایران‌دا بئله اؤلوم حؤکملرینین یوزده ۵۰ دوشدویو قید ائدیلیر. عینی شکیل‌ده، عراق، پاکیستان و سومالی‌ده‌کی رقملرده جدی آزالما وار.

عفو هؤرگوتونون باش کاتیبی کومی نایدوونون دگرلندیرمه‌سینه گؤره بو وضعیت، اؤلکه‌لرین اعدامین بیر چؤزوم اولمادیغینی آنلاماغا باشلادیغینی گؤستریر.

نه وار کی، راپور‌دا مثبت ایرلیله‌ییشلر کیمی بعضی منفی حاللارا دا توخونولور.

مصر، بلاروس، ژاپن سنگاپور، گونئی سودان و آمریکاداکی اعداملاردا آرتیش گؤزلندیگی بیلدیریله‌رک، تایلندین ۲۰۰۹دان بو یانا ایلک اعدامینی حیاتا گئچیردیگی قید ائدیلیر.

سریلانکا پرزیدنتی مایتریپالا سیریسنانین ۴۰ ایلدیر اجرا ائدیلمه‌ین اؤلوم جزاسینین یئنی‌دن تطبیق اولونماغا باشلایاجاغینین آچیقلانماسی دا منفی بیر حادثه کیمی یئر آلیر.

اؤزللیکله مصرده ۲۰۱۷-۲۰۱۸ آراسین‌دا وئریله‌ن کوتلوی اعدام جزالارین‌دا یوزده ۷۵ آرتیش گؤرولدو و ساییسی ۴۰۲دن ۷۱۲یه یوکسلدی. وئریله‌ن اؤلوم حؤکملرینین ایجرا ائدیلمه مدتی و تاریخی فرق‌لی اولدوغو اوچون بو رقملر قارشی‌داکی ایللرین آمارینا تأثیر ائد‌جک.

وئریله‌ن بعضی اعدام جزالاری ایسه داها سونرا عؤمورلوک حبسه دؤنور و یا تطبیق اولونمور.

چین ایسه دونیانین ان چوخ اعدام جزاسی تطبیق ائد‌ن اؤلکه‌سی اولماغا داوام ائدیر. تام رقملر بیلینمه‌مک ایله بیرلیک‌ده مینلرله ایفاده ائدیله‌بیله‌جگی قئید اولونور.