افبیآیا ساتماغا چالیشدیلار
قوزئی کرهنین مادرید ائلچیلیگینه باسقین تشکیل ائتدیلر
قوزئی کرهنین (ایسپانیا) مادرید ائلچیلیگی باسقینینا قاریشدیغی معین ائدیلهن اوغرولارین، پرتغال اوزریندن آمریکا بیرلشمیش دؤولتلرینه قاچدیقلاری، اوغورلادیقلاری سندلری فدرال سوروشدورما بوروسو افبیآیا ساتماغا چالیشدیقلاری آچیقلاندی.
قوزئی کرهنین مادرید ائلچیلیگینه ۲۲ فوریهده باسقین ائدیلهرک ایچریدهکی کادرین گیروو آلینماسی و سونرا بعضی سندلر ایله بیلگیسایارلارین قاچیریلماسی حادثهسینی آراشدیران ایسپانیا میللی محکمه حاکمی خوزه د لا ماتا ۱۴ صحیفهلیک اتهامنامه حاضرلادی.
ادعانامهده سالدیرقانلارین پرتغالین باشکندی لیسبون اوزریندن آمریکا بیرلشمیش دؤولتلرینین نیوجرسی ایالتینه قاچدیغی، داها سونرا افبیآیا بو سندلری ساتماغی تکلیف ائتدیکلری معلوماتینا یئر وئریلدی.
آمریکا بیرلشمیش دؤولتلری مرکزلی نشنیل پوبلیک رادیوسونون خبرینه گؤره، افبیآی مقاملاری مؤوضوع ایله باغلی سواللارا جاواب وئرمهیی رد ائتدی.
آمریکا بیرلشمیش دؤولتلری و ایسپانیا مطبوعاتیندا سالدیرینین آرخاسیندا مرکزی استخبارات تشکیلاتی سیآیای اولدوغو ادعالاری یئر آلمیشدی.
قوزئی کرهنین مادرید ائلچیلیینه، ۲۲ فوریهده بیر قروپون باسقین تشکیل ائتدیگی و ایچریدهکی پرسنلی ان آز ۴ ساعات گیروو گؤتوردویو ایرلی سورولموشدو. حادثهنین، بینادان قاچماغی باجاران قوزئی کرهلی بیر قادین دیپلوماتین ایسپانیا پلیسیندن یاردیم ایستهمهسی ایله اورتایا چیخدیغی بیلدیریلمیشدی.
حادثهیه مداخیله ائدن پلیس اکیبینین، قوزئی کرهنین مادرید ائلچیلیینه گئدهرک وضعیتی آراشدیردیغی، پلیسین قوزئی کره ائلچیلیینه داخیل اولماسیندان قیسا مدت سونرا گاراژدان ایکی ماشینین سرعتله اوزاقلاشدیغی و گیروو گؤتوردوکلری ادعا ائدیلهن ائلچیلیک امکداشینین دا همن کوچهیه چیخدیغی بیلدیریلمیشدی.