"روسیا و ایران، تورکیه‌نین بو تکلیفینی قبول ائتمه‌دی"
گوونلیک شوراسی، تهران ذیروه‌سینین نتیجه‌لرینی و ادلبده‌کی گلیشمه‌لری دانیشماق اوزره توپلاندی
آمریکا بیرلشمیش میلتلر دائمی نماینده‌سی نیکی هیلی، روسیا و اسد رژیمینین ادلبده ۱۰۰دن آرتیق هاوا سالدیریسی دوزنله‌دیگینی بیلدیردی.
بیرلشمیش میلتلر گوونلیک شوراسی، روسیانین طلبی ایله، پرزیدنت رجب طیب اردوغان، روسیا پرزیدنتی ولادیمیر پوتین ایله ایران پرزیدنتی حسن روحانینین جمعه گونو تهران‌دا گئچیردیگی ذیروه‌نین نتیجه‌لرینی و ادلبده‌کی گلیشمه‌لری دانیشماق اوزره توپلاندی.
آمریکانین بیرلشمیش ملتلر دائمی نماینده‌سی هیلی، بورادا دانیشماسیندا،
"روسیا، ایران و اسد رژیمی سیاسی چؤزومله ایلگیلنمیر. تورکیه بونو اؤتن هفته اؤیر‌ندی، ادلبده آتیشکس ایسته‌دی، اما روسیا و ایران، تورکیه‌نین بو تکلیفینی قبول ائتمه‌دی" دئدی.
روسیانین بیرلشمیش ملتلر دائمی نماینده‌سی واسیلی نبنزیا دا، تهران ذیروه‌سینین نتیجه‌لری حاقین‌دا شورایا معلومات وئردی.
نبنزیا، ادلبده اون مینلرجه النصره و ترور هؤرگوتو داعش عضوونون اولدوغونو ایفاده ائد‌رک روسیا، ایران و تورکیه‌نین بوتون سوریه‌ده ترور قالیقلارینی تمیزله‌مه مسئله‌سین‌ده همفیکیر اولدوقلارینی آچیقلادیقلارینی دئدی.
سوریه‌ده‌کی بحرانا سیاسی چؤزومدن باشقا بیر آلتئرناتیو اولمادیغینی بیلدیر‌ن نبنزیا،
"سیاسی چؤزومه قرار وئر‌ن سلاح‌لی موخالیفلری تئزلیکله تروریستلردن آییرماغا احتیاج وار و بو چاغری اولوسلارآراسی توپلومون بوتون عضولرینه" دئدی.
نبنزیا، آستانا ضامنی اوچ اؤلکه‌نین بیرلشمیش ملتلر سوریه اؤزل نماینده‌سی استفان دی میستورا ایله آنایاسا کمیته‌سینین ژنو‌ده ان قیسا مدت‌ده اولوشدورولماسی اوچون مشاوره ائتدیکلرینی بیلدیردی.
سوریه‌لی سیغینماچیلارین اؤلکه‌یه گئری دؤنوشونون ده موذاکیره اولونان مسئله‌لر آراسین‌دا یئر آلدیغینا دقت چکن نبنزیا،
"سوریه حکومتی معلوم اولدوغو کیمی، گوونلیک ضمانتی وئردی. سوریه‌لی سیغینماچیلارین گئری قاییدیشی اوچون تورکیه و ایران ایله اولوسلارآراسی بیر کنفرانس تشکیل اولونماسی اوچون چالیشیریق" دئدی.
نبنزیا، آستانا ضامنی اوچ اؤلکه‌نین سونراکی گؤروشونون روسیادا اولاجاغینی سؤزلرینه علاوه ائتدی.
ایلگیلی‌لی خبرلر
نیکولاس مادورودان ولادیمیر پوتینه تبریک
ونزوئلا پرزیدنتی: بیز بوندان سونرا دا چوخ‌قطبلو دونیا قورماق اوچون بیرلیکده چالیشاجاغیق
