ترامپ-ین سوزلری آوروپانین گوندمینه بومبا کیمی دوشدو

دونالد ترامپ-ین آمریکا پرزیدنتی کورسوسونه اوتورماسینا بیر نئچه گون قالمیش ژورنالیست‌لره خاریجی سیاست ایله علاقه‌دار وئردیگی آچیقلاما‌لار آوروپانین گوندمینه بومبا کیمی دوشدو.

ترامپ-ین ناتو-نون بیر ایشه یارامادیغی، اینگیلتره‌دن سونرا آوروپا بیرلیگیندن یئنی آیریلما‌لارین اولاجاغی باره‌دکی سؤزلری آوروپا پایتاخت‌لاریندا حیرتله قارشیلاندی.

آلمانیا باش ناظیری آنگلا مرکل آوروپانین تالعیی‌نین آوروپانین الینده اولدوغونو وورغولادی، آلمانیا خاریجی ایشلر ناظیری فرانک والتر اشتاین مایر ناتو-نون و آوروپا بیرلیگینین عضو اؤلکه‌لری‌نین خاریجی ایشلر ناظیرلری ایله دانیشدیغینی و اونلارین هامیسی‌نین ناراحات اولدوغونو سؤیله‌دی.

اشتاین مایر ترامپ-ین "ناتو عضو‌لری داها چوخ فینانس آییرما‌لی‌دیرلار" ایفاده‌سینی ده حیرتله قارشیلادیغینی قئید ائتدی.

فرانسا پرزیدنتی فرانسوا اولاند ترامپ-ین آلمانیانین "بیلد" و اینگیلتره‌نین " The Times of London " قزئت‌لرینه وئردیغی موصاحیبه‌لرینده آوروپا بیرلیگی باره‌سینده کی تنقیدلرینه رئاکسیا گؤستردی.

پاریس-ده آمریکا ائلچیسی جین هارتلی نین شرفینه تشکیل اولونان ویداع مراسیمده چیخیش ائدن اولاند:" آوروپا هر زامان ترانس آتلانتیک امکداش‌لیغی داوام ائتدیرمک نیتینده‌دیر. لاکین بونو اؤز دیرلری و ماراق‌لاری ایستیقامتینده گئرچک‌لش‌دیره‌جک. آوروپانین نه ائدجگی ایله علاقه‌دار کناردان مصلحته احتیاجی یوخ‌دور" دئدی.

لیتوانی پرزیدنتی دالیا گریبائوسکایته ترامپ-ین پرزیدنت‌لیگی دؤورونده آمریکانین ناتو-یا قارشی مالی عهده لیکلرینی داوام ائتدیرمه‌لی اولدوغونو وورغولادی.

آمریکانین " Washington Post " قزئتینده آوروپا لیدئرلری ترامپ-ین سؤیله دیک‌لریندن شوک اولدولار" باش‌لیق‌لی یازی درج اولوندو.

متخصصلر آوروپا پایتاختلاریندا ضدیت‌لی آچیقلاما‌لاری دیرلن‌دیرن لیدئرلرین دونالد ترامپ-ین هانسی خاریجی سیاست ایزله‌یه‌جگینی آنلاماغا چالیشدیق‌لارینی قئید ائدیرلر.