آمریکا ایله روسیا آنلاشابیلمه‌دی
"واشنگتن قبول ائدیله‌بیلمز شرط‌لرده اصرار ائتدیگی اوچون آنلاشما هله تامین ائدیله‌بیلمه‌دی"
روسیا خاریجی ایشلر باخانی یاردیمچیسی سرگئی ریابکوو آمریکا ایله سوریه‌ده‌کی مخالیف‌لر قونوسوندا آنلاشاممادیق‌لارینی بیلدیردی.
سرگئی ریابکوو؛ "واشنگتن قبول ائدیله‌بیلمز شرط‌لرده اصرار ائتدیگی اوچون آنلاشما هله تامین ائدیله‌بیلمه‌دی. باتی آژانس‌لارینین وئردیگی شئی‌لر حقیقتله اویوشمور" دئدی.
ریابکوو، روسیانین اینسان‌لارین گوونلی بیر شکیلده حلب‌دن چیخاریلماسی اوچون لازیم شرط‌لری تامین ائتمه‌یه چالیشدیغینی ساووندو.
سوریه‌لی مخالیف‌لر ایسه روسیا و آمریکانین اؤزلرینه بیر تکلیف وئردیگینی آچیقلادی.
بو تکلیفه گؤره؛ سلاح‌لی مخالیف‌لرین، عائله‌لری‌نین و باشقا وطنداش‌لارین حلب‌دن گوونلی بیر شکیلده آیریلما‌لاری تامین ائدیله‌جک.
اگر مخالیف‌لر مثبت جاواب وئرسه، تکلیف 48 ساعات ایچینده تطبیق اولونا‌جاق.
اؤته یاندان، رژیم گوج‌لری و روسیا ساواش اوچاق‌لاری حلبده مخالیف‌لرین کنترلون‌داکی بؤلگه‌لری بومبالاماغا داوام ائدیر.
حلبده ایره‌لیله‌ین اسد گوج‌لری ایسه گونئی‌ده‌کی پالمیرا آنتیک شهرینی تکرار ترور هؤرگوتو داعشه قاپدیردی.
بو آرادا بیرلشمیش میلتلر اوشاق‌لارا کؤمک فوندو، یونیسف، حلب‌دکی بوتون اوشاق‌لارین اؤلکه‌دکی ان پیس شدت حادثه‌لرینه معروض قالدیق‌لارینا و بؤیوک آجی یاشادیق‌لارینا دقت چکدی.
5-6 یاشین‌داکی اوشاق‌لارین بیلدیگی تک شئیین ساواش و بومبا اولدوغونو سؤیله‌ین یونیسف یئتکی‌لی‌لری، حلب‌دکی یاریم میلیون‌دان چوخ اوشاغا یاردیم اوچون 100 مین‌دن چوخ متخصصه احتیاج اولدوغونو آچیقلادی.
