اینسان بئینینین ان آیدین گؤرونتوسو یاییملاندی

اینسان بئینینین، دونیانین ان گوجلو مانیتیک رزونانس گؤرونتوله‌مه (ام‌آرآی) جیهازییلا الده ائدیله‌ن ان آیدین گؤرونتوسو یاییملاندی.

فرانسا اتم انرژیسی و آلترناتیو انرژیلر تشکیلاتیندان وئریله‌ن یازیلی آچیقلامادا، "ایسولت" آدلی م ام‌آرآی جیهازییلا چکیله‌ن بئیین گؤرونتوسونون ۲۰ ایلده‌ن اوزون سۆره‌ن بیر چالیشما نتیجه‌سینده الده ائدیلدیگی ایفاده ائدیلدی.

ام‌آرآی جیهازینین سون بیر نئچه آیدیر ۲۰ کؤنوللو اۆزرینده تست ائدیلدیگی بیلدیریلن آچیقلامادا، ان دقیق بئیین گؤرونتوسونون تخمیناً ۴ دقیقه‌ده الده ائدیلدیی بیلدیریلدی.

آچیقلامادا، ۱۱،۷ تئسلا مانیتیک گوجه صاحب ایسولت ام‌آرآی چیهازییلا قیسا مدتده چکیله‌ن گؤرونتولرین، خسته‌خانالاردا یاییغین اولاراق ایستیفاده ائدیله‌ن جیهازلارلا الده ائدیلمه‌سینین ایسه ساعاتلار سۆره‌بیله‌جگی قید ائدیلدی.

ایسولت پروژه‌سی باشقانی و فرانسا اتم انرژیسی و آلترناتیو انرژیلر تشکیلاتی آراشدیرما مودورو نیکولاس بولان، بیلگیلرین داها یوکسک کیفیتده الده ائدیله‌‌بیلمه‌سی اوچون آراشدیرمانین بیر نئچه ایل داها داوام ائدجگینی ایفاده ائد‌رک، هدفلرینین ۲۰۲۶-۲۰۳۰ ایللری آراسینا قدر نورودژنراتیف خسته‌لیکلرین یانیندا شیزوفرنی و بی‌پولار پوزوقلوغو کیمی پسیکیاتری ساحه‌سینده‌کی بیر چوخ خسته‌لیگی آراشدیرماق اولدوغونو ایفاده ائتدی.

ایسولت ام‌آرآی جیهازی ایله الده ائدیله‌ن اولترا آیرینتیلی آناتومیک بیلگیلرین، آلزایمیر و پارکینسون کیمی خسته‌لیکلرین تشخیصینده کؤمکچی اولماسی گؤزله‌نیلیر.