ایلک دفعه بیر اینسانا بئیین چیپی یئرلشدیریلدی

آمریکا نوروتکنولوژی شیرکتی نورالینک‌ین قوروجوسو ایلان ماسک، ایلک دفعه بیر اینسانا بئیین چیپینین یئرلشدیریلدیگینی آچیقلادی.

ایلان ماسک، ایکس سوسیال مئدیا حسابیندان ائتدیگی پایلاشیمدا، ایلک دفعه بیر اینسانا نورالینک طرفیندن ایمپلنت تاخیلدیغینی بیلدیردی.

ساغالما مدتینین یاخشی گئتدیگینی ایفاده ائد‌ن ماسک، ایلک نتیجه‌لرین "اومود وئریجی" اولدوغونو ایفاده ائتدی.

ماسک، ایلک نورالینک محصولونون آدینین "تله‌پاتی" اولدوغونو، یالنیز دۆشونه‌رک تلفن و یا بیلگی‌سایارین و بونلار واسطه‌سی ایله هارداسا هر جیهازین کنترلونو تامین ائتدیگینی بیلدیردی.

ایلک سئچیلنلرین عضولریندن ایستیفاده ائتمه قابیلیتینی ایتیرمیش شخصلر اولاجاغینی بیلدیرن ماسک، "ایستفان هاوکینگین بیر کاتیب و یا مزایده‌چیدن داها سرعت‌لی ارتباط قورابیلدیگینی خیال ائدین. هدف بو" ایفاده‌لرینی ایشلتدی.

نورالینک، می‌ آییندا بئیین چیپی پروژه‌سینین اینسانلار اۆزرینده سینانماسینا باشلانماسی اوچون آمریکا بیرلشمیش دؤولتلری غذا و درمان ایداره‌سیندن تائید آلیندیغینی آچیقلامیشدی.

داها اؤنجه میمونلار اۆزرینده تست ائدیله‌ن چیپلرین، بئیینده‌کی سیگناللاری باشار ایله یوروملایاراق جیهازلارا کؤچوردوگو بیلدیریلمیشدی.

ماسک و بیر قروپ مهندس طرفیندن ۲۰۱۶دا قورولان نورالینک، بئینه یئرلشدیریله‌جک میکروچیپلر سایه‌سینده فلج و کورلوق کیمی نورولوژیک راحاتسیز‌لیقلاری معالیجه ائتمه‌یی و معلوللارین حیات کیفیتینی آرتیرماغی هدفله‌ییر.