دراگون یوک کپسولو اوزایا گؤندریلدی

آمریکا راکت و اوزای گمی‌سی اوره‌تیجی‌سی اسپیس‌ایکس، اولوسلارآراسی اوزای مرکزینه تست و احتیاج لوازمی داشییان دراگون یوک کپسولونو فالکون راکتیله اوزایا گؤندردی.

آمریکان هاواچی‌لیق و اوزای آژانسی ناسا، تخمیناً ۲ مین ۷۰۰ کیلوگرام یوک داشییان کپسولون یئرلی ساعاتلا ۱۶.۳۰دا فلوری‌دا ایالتین‌ده‌کی کاپ کاناورال هاوا مرکزیندن آتیلدیغینی بیلدیردی.

چرشنبه گونو مرکزه چاتماسی گؤزله‌نیله‌ن یوک کپسولو، مرکزه بیر روبات قولویلا باغلاناجاق. اسپیس‌ایکس، ناسا آدینا اوزای مرکزینه ائتدیگی ۱۴.جو یوک نقلی اولان سفرده، داها اؤنجه ایستیفاده ائدیلمیش بیر راکت و کپسول قوللاندی.

فالکون راکتی و دراگون کپسولو، اولکی یوک داشیمادا ایستیفاده ائدیلدیکدن سونرا دونیایا گئری دؤنموشدو. شیرکت راکت و گمیلری یئنی‌دن ایستیفاده‌یه آلاراق اوزای سفرلرینین و لجستیک داشیمالارین خرجینی آزالتماغی هدفلییر. اوزای مرکزینده ناسا، روسیا فدرال اوزای آژانسی، ژاپن اوزای آراشدیرما آژانسی، آوروپا آراشدیرما و کانادا آراشدیرما امکداش‌لیقلا علمی ایشلر یئریدیر.