آنتونیو گوترش ایسرائیلین یوزلرله فیلیسطینلی وطنداشین اؤلدورولمهسینی پیسلییب
ایسرائیل 4 نفری خیلاص ائتمک اوچون 64-و اوشاق، 57-سی قادین اولماقلا 274 فیلیسطینلی مولکی وطنداشی اؤلدوروب
![آنتونیو گوترش ایسرائیلین یوزلرله فیلیسطینلی وطنداشین اؤلدورولمهسینی پیسلییب](http://cdn.trt.net.tr/images/xlarge/rectangle/19ee/6f8c/c8b6/64e7660e3bb69.jpg?time=1722046622)
بیرلشمیش میللتلر تشکیلاتینین باش کاتیبی آنتونیو گوترش ایسرائیل اوردوسونون 4 اسیری خیلاص ائتمک اوچون نصیراتدا حیاتا کئچیردیگی هوجوملاردا یوزلرله فیلیسطینلی مولکی وطنداشین اؤلدورولمهسینی پیسلییب.
بیرلشمیش میللتلر تشکیلاتینین سؤزچوسو استفان دوجاریک ایسرائیلین نصیرات قاچقینلار دوشرگهسی و موختلیف بؤلگهلره هوجومو ایله باغلی سواللاری جاوابلاندیریب.
دوجاریک بیرلشمیش میللتلر تشکیلاتی باش کاتیبینین ایسرائیلین 4 نفری خیلاص ائتمک اوچون 200-دن چوخ فیلیسطینلینی اؤلدورمهسینه عکسالعملی ایله باغلی سوالا بئله جاواب وئریب:
"باش کاتیب درین تاسوف حسی کئچیریر و یوزلرله فیلیسطینلینین اؤلدورولمهسی و یارالانماسینی پیسلَییر." دئدی.
بوتون طرفلری مولکی اینسانلاری قوروماق چاغیریشینی تکرارلایان دوجاریک، هر بیر اینسان ایتکیسینین فاجیعهوی اولدوغونو سؤیلهدی.
ایسرائیل اوردوسونون غزه زولاغینین مرکزی حیصّهسیندهکی نصیرات قاچقینلار دوشرگهسی و موختلیف بؤلگهلرینه قورودان، هاوادان و دنیزدن عینی واختدا و آغیر شکیلده حیاتا کئچیردیگی هوجوملاردا 64-و اوشاق، 57-سی قادین اولماقلا 274 فیلیسطینلی هلاک اولوب. آرالاریندا 153-و اوشاق، 161-ی قادین اولماقلا 698 فیلیسطینلینین یارالاندیغی بیلدیریلیر.