ایراندان نۆوه سلاح آچیقلاماسی
عباس عراقچی، ایسرائیلدن قایناقلانان نۆوه تهدیدینین، بؤلگه اؤلکهلرینی نۆوه سلاح توتوملارینی گؤزدن گئچیرمهیه مجبور ائدجیگینی سؤیلهدی
![ایراندان نۆوه سلاح آچیقلاماسی](http://cdn.trt.net.tr/images/xlarge/rectangle/ef10/283c/c82f/66542b50a1efa.jpg?time=1722046770)
ایران خاریجی ایلیشکیلر استراتژیک شوراسی کاتیبی عباس عراقچی، ایسرائیلدن قایناقلانان نۆوه تهدیدینین، بؤلگه اؤلکهلرینی نۆوه سلاح توتوملارینی گؤزدن گئچیرمهیه مجبور ائدجیگینی سؤیلهدی.
ایران رسمی خبر آژانسی ایرنایا گؤره، دینی لیدئر آیتلله علی خامنهاییه باغلی خاریجی ایلیشکیلر استراتژیک شوراسی باش کاتیبی عراقچی، دونن قطرده "مسجدی اقصی توفانی سونراسی اورتا دوغودا دؤنوشوملر" باشلیغییلا تشکیل ائدیلهن الجزیره فوروموندا دانیشدی.
دانیشماسیندا ایرانین، فیلیسطین-ایسرائیل آراسیندا "ایکی دؤولتلی" حله قارشی اولدوغونو ایفاده ائدن عراقچی، "ایرانین حلی، فیلیسطیندهکی مسلمانلار، یهودیلر و خریستیانلار آراسیندا رفراندوم ائدیلمهسی یولویلا یارادیلاجاق تک بیر اؤلکهیه دایانیر" دئدی.
بؤلگهده ایسرائیلدن قایناقلانان نۆوه سلاح پروبلئمی اولدوغونا و ایسرائیللی بعضی مقاملارین نۆوه سلاحی ایستیفاده ائتمه تهدیدلرینه دقت چکهن عراقچی، "ایسرائیل، نۆوه سلاحلارا صاحب اولدوغونو نه یالانلادی نه ده دوغرولادی. بو مؤوضوعدا ایستراتژیک نامعلوملوق سئچهنگینی سئچدی آنجاق غزهده ۸ آیلیق مقاومتین آردیندان ایسرائیلین آرتیق بو استراتژیک نامعلوملوق چرچیوهسیندن چیخدیغی گؤرولور" دئیه دانیشدی.
عراقچی، تل آویو رهبرلیگینین بو کوتلوی قیرغین سلاحلارینی ایستیفاده ائدهبیلمه قونوسوندا بیانلار وئردیگی و مؤوجود ایسرائیل رهبرلیگینین بو پتانسیله صاحب اولدوغونو ایفاده ائدرک، "ایسرائیلین نۆوه تهدیدی، بؤلگهدهکی گۆونلیک موازنهسینی دییشدیرهجک و دیگر اؤلکهلری نۆوه توتوملارینی گؤزدن گئچیرمهیه مجبور ائدجک" ایفادهلرینی ایشلتدی.
دینی لیدئر خامنهای، ۲۰۰۰.جی ایللرین باشیندا فتوا چیخاراراق، نۆوه سلاحلارین گلیشدیریلمهسینی و یا ایستیفاده ائدیلمهسینی قاداغان ائتمیشدی.
ایسرائیلین ۱ آوربلده ایرانین دمشقدهکی کونسوللوغونا سالدیریسیندان سونرا، اؤلکهده بعضی سیاستچیلر، خامنهاینین فتواسینین دییشهبیلهجگینی و ایرانین دا نۆوه سلاح اۆرهتهبیلهجگینی ادعا ائتمیشدی.
اولوسلارآراسی اتم انرژیسی باشقانی رافائل ماریانو گروسی، تهرانین، ایستهمهسی حالیندا "بیر نئچه" نۆوه بومبا اۆرتمهیه چاتاجاق قدر زنگینلشدیریلمیش اورانیوما صاحب اولدوغونو بیلدیرمیشدی.