ایراندا سئچیم سۆرهجی باشلادی
ایرانین ایچ ایشلری باخانی احمد واحیدی، دونن آخشام بیر قرارنامه یاییملایاراق سئچیم سۆرهجینین باشلادیلماسی تاپشیریغینی وئردی
ایران، جمهورباشقانی ابراهیم رئیسینین هلیکوپتر قضاسیندا اؤلمهسیندن بیر هفته سونرا، ۲۸ ژوئنده ائدیلمهسی قرارلاشدیریلان جمهورباشقانلیغی سئچیم سۆرهجینی باشلاتدی.
دؤولت تلویزیونونون خبرینه گؤره، ایچ ایشلری باخانی احمد واحیدی، دونن آخشام بیر قرارنامه یاییملایاراق سئچیم سۆرهجینین باشلادیلماسی تاپشیریغینی وئردی.
قرارنامهده، "آیتالله دکتر ابراهیم رئیسی و دگرلی یولداشلارینین شهادتی سببی ایله باشساغلیغی سونارکهن، آناسایانین ۱۳۱.جی مادهسی ایله جمهورباشقانلیغی سئچیم قانونونون ۳۸.جی و ۳۹.جو مادهلری چرچیوهسینده ،۱۴.جو جمهورباشقانلیغی دؤونمی سئچیم سۆرهجینین باشلادیلماسی قراری آلیندی" ایفادهسی ایشلهدیلدی.
بونا گؤره، اؤلکهدهکی ایلگیلی ادارهلره ۳ گون ایچینده اؤز بؤلگهلرینده سئچیم مرکزلرینین قورولماسی و ایداره هیئتلرینین یارادیلماسی تاپشیریغی وئریلدی.
جمهورباشقانی رئیسینین ۱۹ میده هلیکوپتر قضاسیندا حیاتینی ایتیرمهسیندن سونرا آنایاسایا گؤره، ایران لیدئری آیتالله علی خامنهاینین اونایی ایله جمهورباشقانی بیرینجی کؤمکچیسی محمد مخبر، جمهورباشقانلیغی وظیفهسینی وکالتاً اۆستلنمیشدی.
ایران آنایاساسینا گؤره، مؤوجود جمهورباشقانینین حیاتینی ایتیرمهسی دوروموندا یئنی جمهورباشقانینین ان چوخ ۵۰ گون ایچینده سئچیلمهسی مقصدیله مجلیس باشقانی، یارغی ارکی باشقانی و جمهورباشقانی بیرینجی کؤمکچسیندن اولوشان قورولون گرهکلی چالیشمالاری ائتمهسی لازیمدیر.
بو ایستیقامتده یاساما، یئریتمه و یارغی باشقاناری آراسیندا ۲۰ میده ائدیلهن اولاغان اۆستو گؤروشمهده، جمهورباشقانی سئچیمینین ۲۸ ژوئنده ائدیلمهسی قراری آلینمیشدی.
ایلگیلیلی خبرلر
ایسرائیلین لبنانا سالدیریلاریندا اؤلنلر وار
ایسرائیل گوجلری بو سحر ده، اؤلکهنین جنوبونا توپچو آتیشییلا هوجوم ائتدی