ایران: یاخیندا ایسرائیله اؤلومجول ضربهلر وورولاجاق
"هئچ بیر یئره چاتابیلمزلر و بو حرکتلرله گؤزتچیلریمیزین روحیهسی ایکی قاتینا چیخاجاق و انشاالله یاخیندا صهونیست رژیمه داها اؤلومجول ضربهلر وورولدوغونا شاهید اولاجاغیق"
ایران اینقیلاب گؤزتچیلری سپاه اوردوسو سؤزچوسو ژنرال رمضان شریف، "یاخیندا ایسرائیله اؤلومجول ضربهلر ووراجاقلارینی" ادعا ائتدی.
ایران دؤولت تلویزیونونون خبرینه گؤره، ژنرال شریف، باشکند تهراندا تشکیل ائتدیگی مطبوعات کنفرانسیندا ایرانین دمشقدهکی کونسوللوق بیناسینا ائدیلهن سالدیرییا توخوندو.
ایسرائیلین سون زامانلاردا آلدیغی مغلوبیتلرین اینتیقامینی اینقیلاب گؤزتچیلری اوردوسونون باشچیلاریندان آلماغا چالیشدیغینی سؤیلهیهن شریف، "هئچ بیر یئره چاتابیلمزلر و بو حرکتلرله گؤزتچیلریمیزین/پاسدارلاریمیزین روحیهسی ایکی قاتینا چیخاجاق و انشاالله یاخیندا صهونیست رژیمه داها اؤلومجول ضربهلر وورولدوغونا شاهید اولاجاغیق" ایفادهلرینی ایشلتدی.
ایسرائیلین، ایرانین دمشقدهکی کونسوللوق بیناسینا ۱ آوریلده تشکیل ائتدیگی هاوا هوجوموندا، ایران اینقیلاب گؤزتچیلری اوردوسوندان ۲سی ژنرال روتبهسینده توپلام ۷ نفر اؤلموشدو.
هوجوما سرعتلی شکیلده قارشیلیق وئریلهجگینی بیلدیرن ایران، حادثهدن آمریکا بیرلشمیش دؤولتلرینی ده مسئول توتموشدو.