اوکراینا طرفینه گئچن روس پیلوت اؤلدورولدو
شاهیدلر، پیلوتون بد‌نینه چوخ ساییدا مرمی بوشالدان سالدیرقانلارین داها سونرا اتومبیلله جسدین اوزریندن گئچه‌رک قاچدیقلارینی سؤیله‌دی
اوکراینا و روسیا آراسینداکی ساواشدا اوکراینا طرفینه گئچن روس پیلوت، اسپانیادا اؤلدورولدو.
۲ ایلدیر سۆره‌ن اوکراینا-روسیا ساواشیندا آگوست آییندا صف دییشدیره‌رک اوکراینایا قاچان روس ساواش پیلوتو ماکسیم کوزمینووون، ۱۳ فوریه‌ده ایسپانیانین آلیکانته شهرینده‌کی بیر ائوین گاراژینین گیریشینده، سلاحلی سالدیری نتیجه‌سینده اؤلدورولدوگو آچیقلاندی.
اسپانیا رسمی خبر آژانسی ای‌اف‌ای، ژاندارما قایناقلارینا دایاندیردیغی خبرینده، ۱۳ فوریه‌ده اؤلکه‌نین گۆنئیینده‌کی آلیکانته‌ده بیر مجتمعده اولان ائوین گاراژینین اؤنونده سلاحلی سالدیرییا اوغرایان و حادثه یئرینده حیاتینی ایتیره‌ن شخصین روس پیلوت ماکسیم کوزمینوو اولدوغونون معین ائدیلدیگینی بیلدیردی.
خبرده، شاهیدلرین، کوزمینووون بد‌نینه چوخ ساییدا مرمی بوشالدان سالدیرقانلارین داها سونرا اتومبیلله جسدین اوزریندن گئچه‌رک قاچدیقلارینی سؤیله‌دیگی بیلدیریلدی.
سوروشدورما یئریدن ژاندارمانین جسدین اوزرینده، ۳۳ یاشیندا بیر اوکراینا وطنداشینا عاید کیملیک تاپدیغی، داها سونرا ائدیله‌ن آراشدیرمالاردا ایسه اؤلدوروله‌ن شخصین روس پیلوت کوزمینوو اولدوغونون اورتایا چیخاریلدیغی ایفاده ائدیلدی.
اوکراینانین کییئو پوست قزئتی ده اوکراینا عسگری استخبارات مرکزینه دایاندیردیغی خبرینده کوزمینووون اؤلدورولدوگونو بیلدیردی.
خبرده، عینی قایناقلارا، کوزمینووون اوکراینادا قالماق یئرینه اسپانیادا یاشاماغی سئچدیگی یازیلدی.
اوکراینا ایله ساواشین باشلاماسیندان اؤنجه عسگرلیگی بوراخماغا چالیشدیغی و سونراسیندا دا ساواشا گئتمک ایسته‌مه‌دیگی دئییله‌ن روس پیلوت کوزمینوو، ۹ آگوست‌دا، پیلوتو اولدوغو ا‌م‌ای-۸ تیپی هلیکوپتر ایله اوکراینانین دوغوسوندا‌کی بیر حربی مرکزه ائنمیشدی.
اوکراینا عسگری استخبارات مرکزی ایله آنلاشاراق بو اؤلکه‌یه قاچان روس پیلوتون گؤرونتولری او دؤنمده پایلاشیلمیشدی.
کوزمینوو، گؤرونتولرده ساواش سوچلوسو اولماغی رد ائتدیگی اوچون اوکراینایا قاچدیغینی سؤیله‌یه‌رک، دیگر روس پیلوتلارا دا اؤزونون ایزیندن گئتمه‌لری چاغریسینی ائتمیشدی.
