باقری کنی"ایران آرتیق بمت تش چرچیوه‌سینده هئچ بیر محدودیته تابع دئییل"

ایران خاریجی ایشلر ناظیری‌نین معاوینی علی باقری کنی بیرلشمیش میللت‌لر تشکیلاتی تهلوکه‌سیزلیک شوراسی‌نین اؤلکه‌سینه قارشی تطبیق ائتدیگی بالیستیک راکت تحریمی‌نین 18 اوکتبردان اعتباراً سونا چاتدیغینی بیلدیریب.

ایکس سوسیال مئدیا پلاتفورمونداکی پای‌لاشیمیندا مسئله ایله باغلی آچیقلاما وئرن علی باقری دئییب: "بمت تهلوکه‌سیزلیک شوراسی‌نین 2231 سایلی فرمانی چرچیوه‌سینده ایرانا قارشی تطبیق ائتدیگی عدالت‌سیز بالیستیک راکت تحریمی اوکتبرین 18-ده باشا چاتیر. ایران آرتیق بمت تهلوکه‌سیزلیک شوراسی چرچیوه‌سینده هئچ بیر محدودیته تابع دئییل."

قئید ائدک کی، ایران ایله بمت تهلوکه‌سیزلیک شوراسی‌نین بئش دایمی عضوو اولان امریکا، چین، روسیا، اینگیلتره، فرانسا و آلمانیا آراسیندا ایرانین آتوم فعالیتینه دایر دانیشیق‌لار 14 جولای 2015-جی ایلده الده اولونموش راضیلاشما ایله یئکونلاشمیشدی. 6 گون سونرا بو راضیلاشما تهلوکه‌سیزلیک شوراسیندا سسه قویولموش و 2231 سایلی فرمان اولا‌راق قبول ائدیلمیشدی. سؤزوگئدن فرمانا اساساً، ایرانا بالیستیک راکت فعالیت‌لرینه قارشی بیر سیرا تحریم لر تطبیق اولونوردو. تحریم لرین باشا چاتماسی ایرانا بالیستیک راکت فعالیت‌لرینده اؤز موجودی‌سینی اینکیشاف ائتدیرمک و یئنیلمک ایمکانی وئریر.