کیئوده 3-جو قیریم پلاتفورمو ایجلاسی کئچیریلیب
اوکراینانین پایتاختی کیئوده 60-دان چوخ اؤلکه و اولوسلار آراسی تشکیلاتین ایشتیراک ائتدیگی 3-جو قیریم پلاتفورمو ذیروه توپلانتیسی کئچیریلیب.
اوکراینانین پایتاختی کیئوده 60-دان چوخ اؤلکه و اولوسلار آراسی تشکیلاتین ایشتیراک ائتدیگی 3-جو قیریم پلاتفورمو ذیروه توپلانتیسی کئچیریلیب.
اوکراینانین خاریجی ایشلر ناظیری دمیترو کولبانین مودراتورلوغو ایله کیئودهکی هتلده کئچیریلن ایجلاس دا اوکراینا پرزیدنتی ولودیمیر زلنسکی ایله یاناشی، پورتوقالیا پرزیدنتی مارسلو ربلو دی سوسا، لیتوانیا پرزیدنتی گیتاناس ناوسدا، ماجاریستان پرزیدنتی کاتالین نواک، قیریم تاتار تورک خالقینین لیدئری مصطفی عبدالجمیل قیریم اوغلو و چوخ سایدا قوناق ایشتیراک ائدیب.
جمهور باشقانی باش دانیشمانی سفیر آکیف چاغاتای کیلیچین دا ایشتیراک ائتدیگی توپلانتیدا فرانسا پرزیدنتی امانوئل ماکرون، لهستان پرزیدنتی آ آندری دودا، لتونیا پرزیدنتی ادگارس رینکوویچ، استونیا پرزیدنتی آلار کاریس و بیر چوخ اؤلکه لیدئرلرینین گؤندردیگی ویدئوموراجیتلر یاییملانیب.
جمهور باشقانی رجب طیب اردوغان ایجلاسا ویدئوموراجیت گؤندرهرک قیریم تاتار خالقینا دستکینی ایفاده ائدیب.
زلنسکی ایجلاسداکی چیخیشیندا ایجلاسین اهمیتینه دقت چکهرهک دئییب:
"بو ایل ایجلاسدا آوروپا، آسیا، امریکا و افریقادان 63 اؤلکه و اولوسلار آراسی تشکیلات تمثیل اولونور. هر ایل داها چوخ ایشتیراکچی اولماسی ایشغالین اولوسلار آراسی حقوقا و اینسانلارا قارشی جینایت اولدوغونا دایر قلوبال راضیلاشمانین اولماسی دئمکدیر".
قیریم تاتار تورک خالقینین لیدئری و اوکراینا میللت وکیلی مصطفی عبدالجمیل قیریم اوغلو دا 2014-جو ایلده روسیا طرفیندن ایلحاق ائدیلن قیریم-ین خلاص ائدیلمهسینین واجیبلیگینی وورغولایاراق دئییب:
"تورپاقلاریمیزین ایشغالدان آزاد ائدیلهجگینه و اوکراینانین اراضی بوتؤولوگونه اوزانان اللرین قیریلاجاغینا هئچ بیر شوبههمیز یوخدور".
جمهور باشقانی باش دانیشمانی سفیر آکیف چاغاتای کیلیچ دا تورکیه-نین 2014-جو ایلدن قیریمین ایلحاقینا قارشی آچیق و توتارلی بیر سیاست یوروتدوگونو خاطیرلادیب.
"بیزیم دستکیمیز بو محاربه بیتدیکدن سونرا دا داوام ائدهجک"، -دئیه سفیر کیلیچ قئید ائدیب.
ماجاریستان پرزیدنتی کاتالین نواک چیخیشیندا "اوکراینا طرفینده آیدین بیر دوروشا و روسیانین اساسسیز تجاووزونون پیسلنمهسینه احتیاجیمیز وار" دئییب.
ایتالیانین باش ناظیری جورجیا ملونی ایجلاسا گؤندردیگی ویدئوموراجیتده غربین 2014-جو ایلده باش وئرنلری تام قاورایا بیلمهدیگینه دقت چکیب:
"2014-جو ایلده باتیدا باش وئرنلر تام باشا دوشولمهدی و یا بلکه ده موسکوانین ایمپریالیست حرکتینین اورادا دایاناجاغینا اومید ائدیلیردی. بیز یانیلمیشدیق و بونو اعتراف ائتمهلییک".
لیتوانیا، لتونیا، استونیا، لهستان و فینلاندیا لیدئرلری ده قیریما دستک مئساژی وئریبلر.