ایران‌دا توتوقلانان ایکی اوشاق سربست بوراخیلدی

ایران‌دا گنج بیر قادینین پلیس نظارتینه آلیندیقدان سونرا اؤلومو ایله باشلایان گؤستریلرله باغلی حبس اولونان ایکی اوشاق، وضعیتلرینین توپلومدا سس گتیرمه‌سی اۆزرینه سربست بوراخیلدی.

۱۴ دسامبردا باشکند تهران‌دان یاییملانان اعتماد قزئتینه دانیشان البورز ایالتینده‌کی گؤستریلر زامانی توتوقلانان ۱۵ یاشلی امیر حسین رحیمینین آناسی ایلهام نجف، اوغلونون بیر اعتراض سیراسیندا گوونلیک گوجلرینین اعتراضچیلارا ائتدیگی آتیش سببی ایله بدنینده هله ده ساچمالار اولدوغو حالدا ایکی آیدیر حبسخانادا ساخلاندیغینی بیلدیردی.

نجف،

"اوغلوم ۱۳ اکتبردا کرج‌ده گؤزآلتینا آلیندی، بیر هفته هارادا اولدوغونو بیلمیردیم و نهایت اونو بیر اصلاح ائوینده تاپدیم". ایفاده‌لرینی ایشلتدی.

امیرین آغیر اتهاملارلا اوز اوزه قالدیغینی بیلدیره‌ن آنا، اوغلونون آزادلیغا بوراخیلماسی اوچون تعیین اولونان کفالت مبلغینین اونون اؤد‌یه‌بیله‌جگی مبلغه ائندیریلمه‌سینی ایسته‌دی.

آنانین موصاحیبه‌سی، قزئت‌ده یایینلاندیق‌دان سونرا توپلومدا، خصوصاً ده سوسیال شبکه‌لرده بؤیوک سس گتیردی. اعتماد قزئتی امیرین دونن ائندیریملی وثیقه ایله بوراخیلدیغینی آچیقلادی.

دیگر طرف‌دن سوسیال مئدیادا ایلام ویلایتینین آبدانان شهرین‌ده گئچیریله‌ن گؤستریلر زامانی حبس ائدیله‌ن ۱۶ یاشلی سونیا شریفینین ده محاربه (دؤولته قارشی ساواش) اتهامی ایله اعدام جزاسینا محکوم ائدیلدیگینه دایر سوسیال شبکه‌لرده ادعالار اورتایا آتیلدی.

ادعالارلا باغلی آچیقلاما وئره‌ن آبدانان ساوچیسی مسعود کارگر، سونیانین شهرده‌کی گؤستریلر زامانی مولوتوف کوکتئیلی حاضیرلادیغینی و بونون "گؤستریلرین اساس عنصورلارین‌دان بیری" اولدوغونو دئدی.

بونا قارشیلیق شریفینین اعدام جزاسینا محکوم ائدیلمه‌سی ایله باغلی ادعالارین دوغرو اولمادیغینی بیلدیرن کارگر، سونیا شریفی حاقیندا هله ادعانامه‌ حاضیرلانمادیغینی ایفاده ائتدی.

اؤلکه مطبوعاتین‌دا یاییملانان خبرلره گؤره، سونیا شریفی ده اؤتن گئجه وثیقه ایله سربست بوراخیلدی.