ایران: اوکراینا ایله گؤروشمهیه حاضریق
تهران، اوکرایناداکی ساواشدا ایستیفاده اوچون اینسانسیز هاوا آراجلاری داخیل روسیایا سلاح گؤندریلدیگی ایله باغلی ادعالاری یالانلادی
ایران، روسیانین اوکراینادا تهران یاپیمی کامیکادزه سیهالاردان (سلاحلی اینسانسیز هاوا آراجلاری) ایستیفاده ائتمهسی ایله باغلی ادعالاری بیر داها یالانلایاراق بو اتهاملارین حلی اوچون اوکراینا ایله گؤروشمهیه حاضر اولدوغونو بیلدیردی.
ایرانین رسمی خبر آژانسی ایرنانین خبرینه گؤره، خاریجی ایشلر باخانلیغی سؤزچوسو ناصر کنعانی، اوکرایناداکی ساواشدا ایستیفاده اوچون تهراندان اینسانسیز هاوا آراجلاری داخیل روسیایا سلاح گؤندریلدیگی ایله باغلی ادعالارا تپکیسینی یئنهلهدی.
سؤزوگئدن ادعالارین سیاسی آماجلارلا ایران قارشیدی اؤلکهلرین مئدیاسی طرفیندن حاضیرلاندیغینی وورغولایان کنعانی:
"سؤزو گئدن اتهاملاری حل ائتمک اوچون اوکراینا ایله گؤروشمهیه حاضیریق" ایفادهلرینی ایشلتدی.
تهران، اؤنجهدن ده چاتیشما و ساواشا قارشی اولدوغونو بیان ائتدیگینی خاطیرلادان کنعانی، ایرانین اولوسلارآراسی حقوقا اویغون اولاراق اؤلکهلرین تورپاق بوتؤولوگونو ساووندوغونو قید ائتدی.
آمریکا دیش ایشلری باخانلیغی سؤزچوسو ودانت پاتل، دوننکی مطبوعات توپلانتیسیندا، ایرانین اینسانسیز هاوا آراجلاری سیستملرینین روسیا طرفیندن اوکراینادا حربی و مولکی هدفلر قارشی ایستیفاده اولوندوغونو بیلدیررک،
"روس اوپراتورلار بو سیستملردن ایستیفاده ائتمک اوچون ایرانا تعلیمه گئتدیلر" دئدی.