جواد ظریف پمپئونو سسلندیردیگی اتهاملاری اویدورما آدلاندیریب
جواد ظریف بو بارهده توییتر حسابیندا یازیب.
ایرانین خاریجی ایشلر ناظیری محمد جواد ظریف امریکانین خاریجی ایشلر ناظیری مایک پمپئونون تهرانا قارشی القاعده ترور قروپلاشماسی ایله باغلی سسلندیردیگی اتهاملاری اویدورما آدلاندیریب.
جواد ظریف بو بارهده توییتر حسابیندا یازیب.
پمپئونون 2019-جو ایلین آوریل آییندا تگزاس-ین A&M بیلیم یوردوندا ائتدیگی چیخیشدا "من سیا دیرکتورویام. یالان دانیشدیق، آلداتدیق و اوغورلادیق" ایفادهلرینه ایسناد ائدن ظریف"یالان دانیشدیغینی، آلداتدیغینی، اوغورلادیغینی اعتراف ائدهرک، فلاکتلی کاریئرینی داها چوخ ساواش تحریک ائدیجی یالانلارلا آجیناجاقلی شکیلده سونا چاتدیریر. هئچ کس اینانماز. 11 سپتامبرداکی (امریکا-داکی القاعده هوجومو) ترورچولار پمپئونون اورتا دوغوداکی فاووری یئرلریندن گلدی. هئچ بیری ایران-دان دئییل" ایفادهلرینی ایشلهدیب.
قئید ائدک کی، داها اول امریکانین خاریجی ایشلر ناظیری مایک پمپئو ایرانی القاعده-نین یئنی مرکزی اولدوغونو دئمیشدی. او، علاوه ائتمیشدی کی، القاعده-نین حاضیرکی لیدری ایمن الظواهری حاضیردا ایران-دادیر.
امریکانین نیویورک تایمز قزئتی، 14 نوامبر 2020-جی ایل تاریخینده آدی آچیقلانمایان استخبارات صلاحیتلیلرینه اساسلاندیردیغی خبرینده ترور تشکیلاتی القاعده-نین ایکینجی نؤمرهلی آدینین ایران-دا امریکا آدیندان حرکت ائدن ایسراییل جاسوسلاری طرفیندن حیاتا کئچیریلن سوء قصد نتیجهسینده اؤلدورولدوگونو ادعا ائتمیشدی.
امریکانین خاریجی ایشلر ناظیری پمپئو وئردیگی یازیلی آچیقلامادا ایرانین القاعده ترور تشکیلاتینا اؤلکهده یئنی عملیات مرکزلری یاراتما ایجازه وئردیگینی ادعا ائدهرک، القاعده-نین ایران-داکی 5 لیدرینی "خصوصی قلوبال ترورچو" سیاهیسینا داخیل ائتدیکلرینی اعلان ائتمیشدی.
پمپئو ایرانین القاعده-نین "یئنی مرکزی" اولدوغونو ادعا ائتمیشدی.